Аналитика
За блок-трансакција вредна 475 илјади евра информира утрово Македонска берза. Тој износ познат купувач го вложил во 7.206 акции на Стопанска банка Битола. И со тоа обезбедил 1,84 отсто од акционерскиот капитал.
Трансакцијата е реализирана по единечна цена за акција од 4.050 денари. Оттаму, вредноста на блокот изразена во домашната валута е 29.184.300 денари.
Инаку, номиналната вредност на оваа акција е 3.000 денари. Просечната, пак, постигната при последното берзанско тргување од четврти јули, е 3.230 денари.
Во последно време, битолската Стопанска банка е во центарот на вниманието поради извесната можност во догледно време да премине во српска сопственост. Се работи за Алта Груп на Давор Мацура. Во моментот, постапката е во прекин, но не поради тоа што групацијата се откажува од намерата. Како што известија, преземањето нема да се изведе со Алта банка како што беше првично соопштено, туку со друг субјект.
