Аналитика
Најголемата крипто-размена Binance ги блокираше сметките на сите руски клиенти кои се цел на санкции, изјави претставник на компанијата за Ројтерс, но нема да ги замрзне сметките на други иако Украина повика на блокирање на руските корисници на главните платформи за дигитални валути. „Ги блокираме сметките на оние на списокот со санкции ако имаат сметки на Binance и осигуруваме дека сите санкции се исполнети во целост“, рече портпаролот на компанијата во понеделникот, одбивајќи да даде дополнителни детали.
Соединетите Американски држави, Велика Британија, Европа и Канада најавија нови санкции кон Русија во саботата, вклучително и блокирање на пристапот на одредени заемодавци до меѓународниот платен систем SWIFT, по руската инвазија на Украина.
Вицепремиерот на Украина, Михаило Федоров, во неделата изјави дека побарал од големите крипто размени да ги блокираат адресите на дигиталните паричник на руските корисници, кои дозволуваат трансакции во крипто монети. “Ги замолувам сите големи крипто размени да ги блокираат адресите на руските корисници.Клучно е да се замрзнат не само адресите поврзани со руски и белоруски политичари, туку и да се саботираат обичните корисници“, напиша Федоров на својот Твитер-профил.
Федоров, кој е и министер за дигитална трансформација, во саботата на Тивитер понуди „голема награда“ за информации за дигиталните паричници што ги поседуваат руски и белоруски политичари. „Украинската крипто заедница е подготвена да обезбеди дарежлива награда за какви било информации за крипто-паричниците на руските и белоруските политичари и нивната околина. Воените злосторства мора да се гонат и казнуваат!“, стои во оваа Твитер-порака на украинскиот вице-премиер.
Претставник на Binance изјави за Ројтерс: „Нема еднострано да замрзнеме сметки на милиони невини корисници. Крипто требаше да обезбеди поголема финансиска слобода за луѓето ширум светот“.
Binance, најголемата берза за криптовалути во светот, минатиот месец изјави дека сака да се прошири во Русија и соседните држави. Русија е главен пазар за Binance, со над 113.000 членови на нејзиниот Telegram канал на руски јазик. Од 2019 година, Binance им дозволува на корисниците да депонираат и повлекуваат руски рубљи преку компанијата за плаќања Advcash.
Од Advcash, чие седиште е во Белизе, изјавија за Ројтерс дека корисниците ќе можат да продолжат да вршат инстант депозити и повлекувања на Binance преку неговите дигитални паричници. „На нашата платформа, некои корисници може да доживеат ограничувања кои произлегуваат од санкциите наметнати на одредени банки“, се вели во известувањето и се додава „да се осигураме дека нашите услуги се транспарентни, целосно регулирани и обезбедени во согласност со сите важечки закони е и отсекогаш бил наш врвен приоритет“.
Сепак, Binance, која е една од водечките берзи во сферата на криптовалутите, ги објави своите намери да му помогне на народот на Украина во актуелниот конфликт преку донација на најмалку 10 милиони долари за поддршка на хуманитарните напори за подобрување на состојбата на украинските граѓани. Донацијата, ќе се направи преку добротворната фондација која е основана од Binance и ќе биде поделена помеѓу непрофитни и владини организации во Украина.
Меѓу овие организации е и УНИЦЕФ, кој има долга историја на соработка со размена во хуманитарни цели. Други организации кои ќе управуваат со дел од фондовите се УНХЦР, Агенцијата за бегалци на ОН, Исанс и Луѓето во потреба, кои ќе ги фокусираат своите напори на поддршка на раселените деца и нивните семејства.
За да ја координира помошта на трети страни кои исто така сакаат да донираат, Binance започна иницијатива за групно финансирање наречена „Humanity First – Ukraine Emergency Relief Fund“, каде секој може да вложи дел од своите крипто средства за оваа иницијатива. Според размената, овие средства ќе бидат насочени „да помогнат во обезбедувањето итна помош за бегалците и децата и да се поддржи логистиката на терен, како што се храна, гориво и залихи за бегалците“.
Binance веќе донираше 16.042 BNB на овој фонд, што во моментот на донацијата беше еквивалентно на 6 милиони долари. Во фондот веќе придонеле и други донатори. Во моментот на пишување, имаше повеќе од 370 трансакции направени на адресите поврзани со овој фонд, а вкупните донирани изнесуваа 148,25 БТК, во вредност од приближно 6.443.051 американски долари.
Binance не беше единствениот актер кој ги координираше донациите поврзани со украинскиот конфликт. Украинската влада почна да бара донации во криптовалути директно во саботата, преку свои адреси објавени на социјалните мрежи, прифаќајќи биткоин, етер и USDT. Крипто заедницата веќе донираше повеќе од 10,6 милиони долари преку 13.670 трансакции насочени кон гореспоменатите адреси.
