Аналитика
Најранливите категории граѓани, пред се пензионерите, примателите на загарантирана социјална помош, младите, односно студенти и средношколци ќе добијат државна помош со прераспределбата на Буџетот кој е доставен до Собранието, најави премиерот Димитар Ковачевски. Освен тоа, ќе има и ригорозни мерки поради зголемувањето на цените и големите профити.
„Сметам, антикризниот пакет треба да биде обемен, за да опфати повеќе граѓани кои имаат потреба од дополнителни финансиски средства во текот на зимските месеци. Со оглед на тоа дека се работи за категорија граѓани кои не можат да остваруваат дополнителни приходи“, изјави Ковачевски како одговор на новинарско прашање при увидот на почетните градежни активности за изградба на затворен пливачки базен во Општина Карпош.
За поскапувањата во малопродажбата посочи дека на таа тема разговарале со министрите за економија и за финансии.
„Од статистичките анализи изработени од експерти во Министерството за економија, но и од надворешни експерти, се забележува зголемување на цените и профитите во малопродажбата. Соодветно на тие анализи ќе бидат предложени ригорозни мерки од Владата и нема да има пардон. Сигурно ќе има негодувања, но нема да дозволиме во време на криза некој да ги зголемува своите профити во апсолутен износ на сметка на граѓаните, кои треба да врзат крај со крај“, категоричен е премиерот. Притоа додаде дека е можно и замрзнување на цените.
