Комерцијална банка со награда за „Акција со најголем промет во 2022 година“ на Македонската берза

Втора година по ред Комерцијална банка се стекна со наградата „Акција со најголем промет во 2022 година – компании над 50 милиони евра пазарна капитализација“, која ја доделува Македонската берза на хартии од вредност. Со ова Комерцијална банка останува лидер во овој сегмент од пазарот на капитал.

Годишните награди Берзата ги воведе минатата година со цел да им даде јавно признание на компаниите кои во тековната година биле најактивни и најпрепознатливи на домашниот пазар на капитал.

Оваа награда е уште една потврда за атрактивноста на акцијата на Комерцијална банка, која вообичаено е една од најтргуваните на Македонската берза затоа што ја ужива довербата на инвеститорите, кои ги препознаваат успешното работење, транспарентноста и професионалната одговорност на Банката.

„Нашата деловна стратегија останува посветена на успешно работење во сите сегменти од деловниот процес, затоа што тоа е наша мисија и цел и наша обврска кон клиентите и акционерите“, изјави по повод наградата д-р Маја Стевкова Штериева, Главен финансов директор и член на Управниот одбор на Комерцијална банка.

Комерцијална банка е најголема банка во Македонија по износ на вкупна актива, најголем кредитор на корпоративниот сектор и банка со стабилна дивидендна политика.

Извор: kb.mk