Аналитика
Кока-Кола, Спрајт, Фанта и другите безалкохолни пијалаци се повлекуваат низ Европа поради безбедносни причини, по откривањето на високи нивоа на хемиски нуспроизвод од средствата за дезинфекција со хлор.
Некои од пијалоците, затворени во лименки и стаклени шишиња во фабрика во Белгија, содржат „прекумерно висока содржина на хлорат“.
Засегнатите производи се: Кока-Кола, Спрајт, Фанта, Фузе чај, Минут Меид, Налу, Ројал Блис и Тропико.
Coca-Cola Europacific Partners Belgium изјави за новинската агенција АФП дека контаминираните пијалоци се дистрибуирани во Белгија, Холандија, Британија, Германија, Франција и Луксембург од ноември.
Хлоратот, кој може да предизвика дефицит на јод, е нуспроизвод на средствата за дезинфекција со хлор што широко се користат во третман на вода и преработка на храна.
„Поголемиот дел од засегнатите и непродадените производи веќе се отстранети од полиците на продавниците и продолжуваме да преземаме мерки за отстранување на сите преостанати производи од пазарот“, изјави Кока-Кола за АФП.
Коментирајќи за количествата, фирмата додава: „Немаме прецизна бројка, но јасно е дека се работи за значителна количина“.
Производителот на пијалаци рече дека проблемот бил откриен при проверки во фабрика во Гент.
