Аналитика
Косовската „Вива фреш“, преку новотворена фирма во Албанија – СМА ХОЛДИНГ Ш.П.К., ја купува скопската „Студио модерна“ која, пак, е дел од интернационална групација и е позната по продажбата на брендирани производи како што се „Топ Шоп“, „Дормео“, „Делимано“, „Волкмакс“ и „Велнео“. Комисијата за заштита на конкуренција која е известена за намерата за купување поради концентрација објасни: „СМА ХОЛДИНГ Ш.П.К. Албанија е дел од групацијата во која, преку друштво основано од страна на нејзиниот основач во Република Косово, е присутна во Република Северна Македонија преку друштвата: ВИВА ФРЕШ СТОРЕ ДООЕЛ Скопје и Кит ГО ДООЕЛ Штип“.
„Пари“ во соработка со БизнисМрежа.мк анализираше каков бизнис добива косовската фирма во Македонија и какви резултати досега остварувала.
На официјалната страница на косовската „Вива фреш“ пишува: „Семејството Реџепи е со долга традиција во трговија, работеше со најголемата мелница во регионот. Во 1964 година семејството Реџепи ја изгради првата електрична мелница во регионот. На истата локација почнале да продаваат овошје и зеленчук“.
СКОПСКАТА СТУДИО МОДЕРНА ПРЕКЛАНИ БИЛА ЗАГУБАР
Како добри трговци, веројатно семејството Реџепи „намирисале“ добар бизнис и во „Студио модерна“, иако во 2022 година (последни годишни податоци) скопската фирма била загубар. Податоците покажуваат дека СТУДИО МОДЕРНА ДООЕЛ Скопје преклани имала 204 вработени, направила приход од 8,3 милиони евра, но со толку пари не успеала да реализира добивка, туку годината ја завршила со минус од речиси 1,6 милиони евра.
СТУДИО МОДЕРНА ДООЕЛ Скопје е во сопственост на „Студио Модерна Холдингс Инвестментс Б.В.“, која ја почнала својата приказна во 1992 година во Словенија. Тогаш била компанија за директна продажба со само еден бренд – „Космодиск“.
„Од кога почнавме со продажбата на првите наши производи, пред три децении, ‘Студио Модерна’ порасна во интернационален бизнис и водечки синџир за малопродажба во повеќе канали во Централна и Источна Европа, присутен во 19 земја со вкупен досег од 160 милиони потенцијални купувачи. Денес вработуваме повеќе од 5.000 луѓе и нашата мисија не е променета – сакаме да им помогнеме на нашите купувачи да го променат животот на подобро“, велат од „Студио модерна“.
Денеска компанијата е присутна во 19 држави во Централна и во Источна Европа и како што пишува на нивната официјална страница, допираат до 160 милиони потенцијални купувачи, емитувајќи над 70 часа реклами дневно на повеќе од 130 ТВ канали, а имаат и над 120 интернет продавници.
СИНЏИРОТ КИТ-ГО ДОНЕЛ ОДЛИЧНА ДОБИВКА
Во однос на компаниите кои веќе се во сопственост на косовската групација, „Кит-Го“ ДООЕЛ Штип во 2022 година била во добивка, а „ВиВа Фреш Сторе“ ДООЕЛ Скопје во загуба.
Штипскиот синџир на маркети „Кит-го“ беше купен од страна на косовската „Вива фреш“ во 2021 година. Со новиот сопственик компанијата ја заврши 2022 година со вкупен приход од 24,5 милиони евра и со нето-добивка од 1,6 милиони евра.
Сепак, со скопската фирма на „Вива фреш“, на семејството Реџепи лани не му одело добро. Направениот промет бил 9,3 милиони евра, но компанијата била во загуба од 462.000 евра.
