Аналитика
Раздвиженост на Берзата во мај и зголемени вредности, но без промени од аспект на манифестираниот инвеститорски интерес. Или, тие што ги вложуваат своите пари во акции „газат“ на сигурно, па составот на првата петорка во последниот месечен билтен не отстапува многу од претходните.
И без да се погледнат податоците, сигурно е дека на првата позиција како најтргувана е акцијата на Комерцијална банка. Побарувачката во текот на мај ја формира просечната цена од 17.948,17 денари, а максимално достигнатото ниво е 18.350 денари. Преку 388 трансакции се купени 6.039 акции, а остварениот промет е во износ од 108.389.021 денар, односно 1.762.182 евра. Во структурата на прометот има учество од 26,18%.
И досега се покажа дека инвеститорите најмногу „палат“ на банкарските акции. Веднаш зад Комерцијална е НЛБ банка, чии берзански резултати велат: со истргуваните 2.461 акција направен е промет од 97.335.275 денари или 1.582.513 евра. Бројот на трансакциите е 349, максималната цена во мај е 41.000, а просечната 39.551,11 денари. Има удел во прометот од 23,51%.
Кога втора, кога трета, акцијата на нашата најголема и најуспешна фармацевтска компанија секогаш е во првата петорка. Овојпат, со износот од 95.110.232 денари/1.546.147 евра во вкупниот промет партиципира со 22,97%. Количината од 4.570 акции на „Алкалоид“ е истргувана низ 262 трансакции, при што постигнатата максимална цена е 21.100 денари, а просечната месечна 20.811,87 денари.
Редовно на оваа листа е и „Макпетрол“, чија акција во друштвото на најтргуваните е и со највисока цена – максимална 79.000, просечна 76.276,45 денари. Во петиот месец од годината се купени 459 акцииво 106 трансакции. Реализирани се 35.010.889 денари, односно 569.232 евра, кои со 8,46% имаат удел во вкупниот промет.
Топ пет листата се заокружува со „Македонски телеком“ и истргуваните 44.753 акции. Просечната цена на акцијата на доминантниот телекомуникациски оператор на македонскиот пазар е 420,16, а максималната во мај 425 денари. Преку 136 забележани трансакции направен е промет од 18.803.214 денари или 305.705 евра, кој има учество од 4,54%.
Бројките од мајскиот билтен на Македонска берза покажуваат дека пазарната капитализација е зголемена за 0,55% и е во износ од 271.685.529.164 денари. Вкупниот месечен промет изнесува 664.903.616 денари, а во однос на април има раст од 0,32%. Број на трансакции е 1.583 и тука се бележат плус 4,28%. Основниот берзански индекс МБИ10 се зголемил за 2,13% – на 7.447,49.
