Аналитика
Две информации поврзани со акциите на Комерцијална банка.
Првата гласи – Фатмир Етеми, кој е член на Надзорниот одбор, станал сопственик на дополнителни 84 обични акции издадени од најголемата македонска банка. Од каде што оваа вест ја споделија со инвеститорската јавност преку Македонска берза.
Втората вест вели – уште една блок трансакција со акциите на Комерцијална банка. Купен е пакет од 175 акции, за кои се платени 3.255.000 денари. Единечната цена за акција е 18.600 денари.
Вложените 52,8 илјади евра во хартиите од вредност издадени од најуспешната домашна банка, ја претставуваат 22-та блок трансакција од почетокот на годинава. Или досега, само преку блокови се купени 10.846 акции. За нив се платени вкупно 177.084.736 денари, односно над 2,87 милиони евра.
Последната блок трансакција доѓа само два дена откако на берзанската листа беше забележа продажбата на четири пакети, со вкупно 864 акции и во вредност од над 259 илјади евра.
Гледано по месеци, во март и во мај имало по само еден блок. Со 1.525 акции и вложени над 413 илјади евра, односно 454 акции и 130 илјади евра.
По две блок трансакции берзанската статистика забележала во јануари: 455 акции и вредност од 110,7 илјади евра и 165 акции и над 40 илјади евра; и во април – првата кога е постигната највисоката цена од 18.840 денари, по која се купени 1.500 акции за 458,6 илјади евра и втората со 479 акции вредна над 142,2 илјади евра.
Најголемата бројка на реализирани блокови – 11, е во февруари. Само во тој месец на овој начин биле купени 5.229 акции. Најголемиот пакет содржел 2.000 акции, а купен е по најниската единечна цена од 12.700 денари за акција.
Исто така, денес се истргувани и 503 акции на официјалниот пазар, по цена од 18.701 денар и промет од 9.372.790 денари или 152,1 илјада евра.
Не е невообичаена заинтересираноста за хартиите од вредност емитувани од Комерцијална банка. Потврдена е на банкарскиот пазар и во континуитет ги зголемува резултатите од работењето. Сето тоа влијае врз вредноста на акцијата, која од просечните 12.509,55 денари, со кои ја заврши минатата година, на денешната официјална берзанска листа е со просек од 18.633 денари
