Аналитика
Млечните производи и тестенините од четврток треба да се продаваат по намалени цени. Од увозниците на тестенини кои се ослободени од царинските давачки нема реакции, но негодувања произлегуваат од чинителите на млекарската индустрија. Сметаат дека од нив се бара премногу, односно дека по веќе намалените цени по основа на користењето субвенционирана струја, тешко ќе го издржат дополнителното кастрење од десет до 15 проценти. Се жалат дека на овој начин ќе бидат втурнати во загуби.
Наспроти поплаките, министерот за економија Крешник Бектеши уште минатата недела им порача на производителите на млеко и млечни производи да не вршат притисок врз кооперантите, инсистирајќи на прецизно направените анализи, според кои, а согласно и утврдената маржа, имаат простор од 20 проценти да калкулираат со цените. Како што нагласи, ќе немаат загуби, туку само помал профит.
Доколку самите доброволно не ги коригираат цените, тогаш и тие ќе бидат ствени под мраз, како што е случај со лебот. Станува збор за трајното кравјо млеко со масленост од 2,8, 3,2 и 3,5 проценти, за урда, кравјо и мешано бело сирење, кравји кашкавал, кисело млеко, павлака и јогурт.
Исто така, Битиќи најави дека во текот на оваа недела ќе се направат и анализи за можноста да се намалат цените и на јајцата, шеќерот и оризот од домашно производство.
За непочитувањето на владините мерки следуваат казни од 800 до десет илјади евра. Во четврток инспекторите од Државниот пазарен инспекторат ќе бидат на терен. Како што најавуваат, неселективно ќе казнуваат согласно Законот за трговија, а воедно, апелираат до граѓаните веднаш да пријават доколку во малопродажбата забележат неправилности кај цените на овие производи.
Ова веќе функционира во однос на белиот и полубел леб, на кои Владата им одреди единствена цена од 33 денари. По минатонеделните 300 контроли, од ДПИ се издадени прекршочни платни налози во износ од 960.000 денари, односно повеќе од 15 илјади евра. Извршени биле 750 надзори во трговски објекти на територијата на државата, при што се издадени над 65 прекршочни платни налози со вредност од над 3 милиони денари, или околу 48,6 илјади евра.
