Аналитика
Добивка или позитивен финансиски биланс од 89 илјади евра е билансот од шестмесечното работење на Градскиот трговски центар, некогашен симбол на главниот град и единствен објект на кој скопјани му ја изразија својата наклоност со гушкање.
Официјалните бројки од финансискиот извештај објавен преку Македонска берза покажуваат дека во првата половина од годината се инкасирани приходи од 121.447 илјади денари, односно безмалку два милиони евра. Износот е за пет насто повисок во однос на претходната година.
Во речиси ист износ – 115.965 илјади денари/ 1,9 милиони евра се направените трошоци. Зголемувањето во овој дел е за три проценти. Инаку, доминираат трошоците за вработените, кои се 803 илјади евра.
Оттаму, како што се посочува, „остварен е позитивен финансиски резултат во бруто износ од 5.482 илјади денари“.
Како и во сите досегашни финансиски извештаи, и во овој (само се менува периодот на кој се однесува), од ГТЦ наведуваат:
„Целта на нашето работење е да оствариме позитивни резултати во наредниот период за тековната 2023 година со максимално ангажирање и целосно искористување на капацитетите со кои располага нашето Друштво“.
По неколкугодишните прикажани загуби, се чини, заложбата на раководството почнува да се остварува. Всушност, по првите сто дена од годинава, кога од Друштвото објавија дека се во плус 130 илјади евра, се доби впечаток дека на ГТЦ конечно му тргна.
Тоа, со оглед на претходните бројки: минатата година ГТЦ ја заврши со загуба од 637 илјади евра. На крајот од 2021 минусот беше 581 илјади евра, а во 2020 – 662 илјади евра.
Затоа и добивката е добра вест. Притоа, мора да се напомене дека во однос на минатата година е забележливо и намалување на трошоците за вработените, кои на крајот од 2022 изнесувале 812 илјади евра. Освен тоа, напредок има и покрај тоа што дел од дуќаните не се издадени, односно претставуваат таканаречен „мртов капитал“.
Впрочем и основната дејност е стопанисување со деловен простор во здание од речиси 120.000 квадратни метри, во кое добар дел од дуќаните се во приватна сопственост. Додека Друштвото кое управува располага со триесеттина проценти од деловниот простор. Во тој контекст и повеќегодишните залагања на дуќанџиите да им се овозможи влез во управувачката структура.
Воедно, ГТЦ го има статусот на фирма за вдомување партиски кадри, при што во текот на годините, освен загубите, постојано беше во центарот на вниманието и како извор на скандали, а одговорност за сетот тоа – немаше.
Со ГТЦ раководи Одбор на директори во состав: Ѓоко Трајчевски – извршен член и извршен директор, како и неизвршните членови Трајанка Тасевска, Бранко Цветановски, Стојан Станиславски, Насер Алиу.
