Гранит ги објави финансиските резултати за првото шестмесечие

ГД Гранит АД Скопје (Друштвото) за периодот Јануари – Јуни 2021 година оствари позитивни финансиски резултати искажани во неревидираните консолидирани финансиски извештаи.

Консолидираните финансиски извештаи за периодот Јануари –Јуни 2021 година ги опфаќаат работењето на следните друштва вклучени во консолидацијата:

• ГД Гранит АД Скопје – матично друштво
• Хотел Гранит ДООЕЛ Охрид – 100% поседуван
• Карваш ДООЕЛ Скопје – 100% поседуван
• Гранмак Виена гмбх – 100% поседуван
• Гранмак експорт-импорт гмбх Германија – 100% поседуван
• ГД Гранит ДОО Бања Лука БИХ – 100% поседувана
• ГД Гранит Подружница Бања Лука БИХ – 100% поседувана

Биланс на успех

Вкупни приходи

Остварените консолидирани вкупни приходи во периодот Јануари – Јуни 2021 година изнесуваат 2.217.751 илјади денари и во споредба со остварените во истиот период 2020  година бележат намалување за 4%.

Приходите од продажба за периодот Јануари – Јуни 2021 година изнесуваат 2.107.698 илјади денари и во споредба со остварените во истиот период 2020 година бележат намалување за 4%. Намалувањето се должи пред се на фактот дека во првата половина на претходната година се извршуваа неколку проекти кои завршија во текот на 2020 година (експресен пат Штип Крупиште и Гасовод), додека новите започнати проекти се во почетна фаза на изведување. Намалувањето на приходите предизвика и соодветно намалување на расходите на Друштвото.

Финансиските приходи за периодот Јануари – Јуни 2021 година изнесуваат 4.887 илјади денари и во споредба со остварените во истиот период 2020 година бележат намалување за 92%. Намалувањето се должи на фактот дека финансиските приходи до 30,06,2021 не се остварени.

Вкупни расходи

Остварените консолидирани вкупни расходи во периодот Јануари – Јуни 2021 година се во износ од  2.133.186 илјади денари,  споредено  со истиот период 2020 година бележат  намалување за 4% .

Во рамките на оперативните расходи, трошоците за материјали и суровини бележат зголемување за 7% во однос на минатата година, пред се како резултат на зголемување на пазарните цени на одредени клучни материјали за изградба како и недостигот и доцнењата во нивна испорака.

Трошоците за вработени и останатите оперативни расходи исто така се зголемени во однос на претходната година за 3% и 4% респективно, пред се како резултат на зголемување на износите на минималната плата и останатите административни оперативни расходи.

Трошоците за услуги се намалени во однос на претходната година за 15% како резултат на помалиот износ на трошоци за подизведувачи кои директно зависи од обемот на извршени работи.

Во периодот Јануари – Јуни 2021 година, Друштвото оствари консолидирана добивка во износ од 84.565 илјади денари, што споредено  со истиот период 2020 година бележи намалување за 7%.

Вкупната консолидирана сеопфатна добивка изнесува 254.695 илјади денари, и е поголема од добивката пред се поради останатата сеопфатна добивка во износ од 170.891 илјади денари која произлегува како резултат на евидентирана нереализирана добивка од зголемување на пазарната вредност на портфолиото акции кои ги поседува Друштвото во првата половина на 2021 година.

Остварените финансиски резултати по друштва во консолидацијата се како што следува:

Биланс на состојба

Вкупната актива на Друштвото на 30.06.2021 година изнесува 7.381.105 илјади денари и во споредба со остварената во однос на декември 2020 година е повисока за 3%.

Постојаните средства на Друштвото на 30.06.2021 година изнесуваат 3.647.636 илјади денари и во споредба со декември 2020 година се повисоки за 1% пред се поради новите набавки во периодот како и поради зголемување на вредноста вложувањата во хартии од вредност (портфолиото на акции кај други).

Тековните средства на Друштвото на 30.06.2021 година изнесуваат 3.733.470 илјади денари и во споредба со декември 2020 година се повисоки за 5%.

Тековните обврски на Друштвото на 30.06.2021 година изнесуваат 1.653.629 илјади денари и во споредба со декември 2020 година се повисоки за 2%.

Друштвото нема долгорочни обврски.

Сметководствени политики и методи на вреднување

 Во периодот на известување во 2021 година нема промени во сметководствените политики и методи на вреднување на позициите во консолидираните финансиски извештаи на ГД Гранит АД.

Дивиденда

Во периодот Јануари – Јуни 2021 година, е одржано Годишното Собрание на акционери за 2020 година на 21.05.2021 на кое се одлучувало за распределба на дивиденда за 2020 година и истата изнесува 46.179 илјади денари. Исплатата на оваа дивиденда ќе се изврши до 30,09,2021 година.

Инвестиции

Вкупните инвестиции во основни средства  во периодот Јануари – Јуни 2021 година  изнесуваат 89.654 илјади денари, од кои најголем дел или 75.157 илјади денари се во опрема и механизација.

Промени во кредитни задолжувања

Во периодот Јануари – Јуни 2021 година, има промени во кредитните обврски на Друштвото, односно Друштвото има нови задолжувања по краткорочни кредити во износ од 12.000 илјади денари, но истите се отплатени при што заклучно со 30.06.2021 година Друштвото нема кредитни обврски.

Очекувања во престојниот период

Светската пандемија Ковид-19 се очекува да има силно влијание врз светската економија, а следствено на тоа и врз македонската економија во наредниот период. Влијанијата ќе имаат ефект посебно врз намален обем на активности, трговија, размена и движење на луѓе и стоки. Одредени сектори како што се угостителство, туризам и транспорт се директно погодени од влијанието на кризата со вирусот.

Друштвото континуирано ги следи движењата во националаната, регионаланата и глобалната економија со цел да се добијат информации за полесно одлучување. Согласно намалувањето на обемот на активности и пад на македонската економија во претходната година на БДП за околу -3 до -4%, како и потешкотиите во тековната година, условите во кои ќе работи Друштвото ќе бидат изменети.

Во текот на првата половина на 2021 година, особено по месеците април и мај се забележуваат позитивни придвижувања во економијата и се очекува исите да продолжат во наредниот период, но истото зависи од ситуацијата со вирусот особено во месеците по септември 2021 година.

Друштвото оперира во сектор градежништво кој не е директно погоден како секторите туризам,  угостителство и слични такви дејности со оглед дека истите се соочија со целосно затварање на нивните деловни активнсти. Секторот градежништво во времето на екот на пандемијата продолжи да функционира но во изменети и новонастанати околности во смисла на отежнати и успорени активности пред се поради проблемите со транспорт на луѓе и стоки до соодветните објекти за градење.

Друштвото ги презема сите неопходни активности за прилагодување на новонастаната состојба и ќе настојува да ги заврши сите предвидени активности согласно плановите за градење со инвеститорите и истото во наредниот период пред се ќе зависи слободното движење на стоки и луѓе, како и ограничувањата на движење дадени од надлежните органи.