ГОДИШНИТЕ ОДМОРИ СЕ РЕФЛЕКТИРААТ НА БЕРЗАТА: Мал број трансакции, понизок промет

За Македонска берза август беше мирен месец. Податоците укажуваат дека летото и годишните одмори се одразиле врз берзанските активности, кои бележат надолни промени. Сепак, и во тие услови нема отстапувања во однос на најатрактивните акции за тргување.

Акцијата на најголемата македонска банка Комерцијална банка останува на врвот од топ 5 најтргуваните. Во 245 трансакции истргувани се 4.161 акција. Постигната е просечна цена од 12.110,94 денари. Прометот изнесува 50.393.639 денари, односно 819.502 евра. Во структурата на прометот оваа акција е доминантна, партиципира со 41,44 проценти.

Во август акцијата на скопски „Алкалоид“ забележа просечна цена од 17.417,12 денари. Истргувани се 2.113 акции, при што е направен промет од 36.802.381 денари или 598.493 евра учество. Со евидентираните 156 трансакции, акциите на фармацевтскиот гигант учествуваат во вкупниот промет со 30,26 проценти.

Во петорката што ја сочинуваат најтргуваните акции, највисока е цената на онаа од „Макпетрол“, со просечни 64.357,66 денари. Се тргувало со 142 акции од најголемиот дистрибутер на горива, при што учеството во прометот е 7,52 отсто. Притоа, преку 43 трансакции остварен е промет од 9.138.788 денари/148.615 евра.

Следува акцијата на НЛБ Банка. Истргувани се 213 акции по просечна цена од 27.761,15 денари. Прометот е во износ од 5.913.124 денари или 96.161 евро, а е реализиран преку 34 трансакции. Во структурата на вкупниот промет, акцијата на банката учествува со 4,86 проценти.

И акцијата на скопската Стопанска банка го задржа во август местото на топ 5 листата. Регистрирани се 19 трансакции, а истргувана е количина од 3.210 акции по просечна цена од 1.344,23 денари. Оттука прометот изнесува 4.314.968 денари, односно 70.171 евро и во структурата има удел од 3,55 проценти.

Инаку, сите берзански параметри во август бележат пад. Пазарната капитализација е намалена за 1,21 отсто во однос на јули и изнесува 217.764.987.844 денари. Кај прометот кој е во износ од 195.001.584 денари, забележан е пад од 0,72 проценти. Бројот, пак, на реализирани трансакции – 637, е со минус од 18,65 проценти.

Кај берзанскиот индекс намалувањето МБИ 10 е 0,92 отсто и тој во август е со вредност 5.724,79.

M.A