Кои се платите во Германија: Странците скоро 900 евра помалку од домашните

Странците кои се вработени во Германија заработуваат многу помалку од домашните граѓани, според статистичките податоци .

Додека германските граѓани минатата година имале просечен приход од 3.509 евра бруто. пред оданочување и придонеси, таа вредност за странците била 2.614 евра.

Тоа се цели 895 евра или четвртина помалку.

Во прашање не е просекот, туку таканаречената средна вредност, вредноста под и над, која е точно половина од целиот приход.

Странците работат со помалку платени работи

Разликата меѓу Германците и странците е особено драстична кога станува збор за новодојденците од Сирија, Авганистан или Еритреја кои заработуваат 1.475 евра помалку од локалното население.

Статистичките податоци ги објави Сојузната влада како одговор на парламентарната истрага од „Алтернатива за Германија“.

Особено се забележува колку разликите се зголемија во претходните години – така што во 2010 година разликата беше 11,6 проценти (317 евра).

Разликата не може да се припише само на образованието бидејќи таа постои дури и кај неквалификуваните работници, странците добиваат 415 евра помалку од Германците.

Неквалификуваните работници од Србија и регионот заработуваат 208 евра помалку месечно, додека луѓето од бегалските земји имаат 657 евра помалку месечно.

Само 16 проценти од сите германски вработени работат во таканаречениот „сектор со ниски плати“, додека учеството на странците е 37 проценти.

Дали миграцијата ја намалува заработката?

Германската влада ја објаснува разликата во платите со тоа што работниците од странство честопати имаат помалку искуство и експертиза.

Според одговорот на владата, вработувањето на повеќе странци може да има „ефект на притисок врз просечната заработка“.

„Луѓето кои штотуку се преселија во Германија се на почетокот на својата кариера“, вели Херберт Брикер од Институтот за истражување на пазарот на трудот во Агенцијата за труд.

„Нивните плати значително ќе растат за време на нивните кариери“, рече тој за агенцијата ДПА.

Рене Спрингер, пратеник од Алтернатива за Германија, кој ја праша владата, рече дека „имиграцијата не смее да доведе до фрлање плати“.

Неговата партија силно се спротивставува на масовната имиграција, пред се на приемот на барателите на азил.

Брикер, пак, вели дека „доаѓањето на мигранти има само маргинално влијание врз платите“.

Разликите, според Владата во Берлин, можат да се намалат со законски пропишаната минимална плата што постои веќе неколку години и со поттикнување на странците да студираат во Германија.

Според Сојузната агенција за труд, во последниот месец од минатата година, 21 милиони домашни граѓани и три милиони странци имале работно место со полно работно време во Германија.