Аналитика
За да го стимулира продолжениот работен век на своите граѓани и по пензионирањето, германската Влада денес усвои нацрт-закон за поттикнување на работата по пензионирањето, дозволувајќи им на оние што го прават тоа да заработуваат до 2.000 евра месечно без данок, во обид да се борат против недостигот на работна сила во најголемата економија во Европа.
Промената треба да стапи на сила на почетокот на 2026 година и се очекува да ја чини државата 890 милиони евра годишно во изгубени даночни приходи од 2026 до 2030 година, според нацрт-законот што го виде Ројтерс.
„Воспоставуваме дополнителни стимулации за економски раст во Германија“, изјави министерот за финансии Ларс Клингбеил во соопштението. „За ова, на бизнисот особено му се потребни постари и искусни работници и квалификувани професионалци.“
МЕРКА ПРОТИВ ПАДОТ НА ДЕМОГРАФИЈАТА
Германија, како и многу други развиени европски држави, последниве децении се соочува со неповолна демографска слика – населението старее, а и, покрај емиграцијата, обемот на расположливата работна сила има константен тренд на намалување. Во 2030 година, работното население на Германија веројатно ќе се намали за 6,3 милиони луѓе од 2010 година, според извештајот за демографијата на Министерството за внатрешни работи. Ова ќе го намали бруто домашниот производ (БДП) по лице бидејќи ќе има помалку работници за секој пензионер.
„Нашите компании веќе очајно бараат квалификувани работници, а демографските трендови дополнително ќе го влошат недостигот“, рече министерката за економија Катерина Рајхе, додавајќи дека бројот на лица во работоспособна возраст се намалува за околу 400.000 лица годишно.
Законот се однесува на вработените кои подлежат на задолжително социјално осигурување и кои ја поминале стандардната возраст за пензионирање од 67 години.
Со постојната обврска за плаќање придонеси за социјално осигурување што останува во сила, социјалниот систем исто така ќе има корист од бонусот, соопшти Министерството за финансии.
Германските мерки за охрабрување на работниците да се пензионираат подоцна доаѓаат во време кога владите низ Европа се свртуваат кон пензиски реформи за да се справат со недостигот на работници и да го намалат товарот врз нивните пензиски системи.
Сепак, тоа е политички осетлива тема што може да има висока политичка цена за владите, како што се гледа во Франција.
Францускиот премиер Себастијан Лекорну во вторникот ја суспендираше значајната пензиска реформа од 2023 година до по претседателските избори во 2027 година, попуштајќи пред притисокот од левичарските пратеници кои бараа таков потег за да го обезбедат неговиот политички опстанок.
