Аналитика
Германија ја губи индустриската сила – десетици илјади работни места исчезнаа за само една година. Производството забавува, а стравот од „деиндустријализација“ станува сѐ погласен. Според анализа на консултантската куќа EY, вкупниот број на вработени во индустријата заклучно со 30 јуни изнесувал 5,42 милиони – што е за 2,1 процент помалку отколку дванаесет месеци претходно. За само една година изгубени се околу 114.000 работни места, а ако се спореди со 2019 година, пред пандемијата, падот е уште поголем – цели 245.000, или 4,3 проценти.
Падот не застанува ни кај приходите. Во вториот квартал индустрискиот промет се намалил за 2,1 процент, што е осми последователен квартал со минус. Исклучок е единствено електроиндустријата, додека автомобилската, која е срцето на германската економија, бележи пад од 1,6 проценти. Продажбата е слаба, кинеската конкуренција е жестока, а транзицијата кон електрична мобилност го засилува притисокот.
На сето тоа се надоврзуваат царинските спорови со САД и забавувањето на растот во Кина. Високите царини што ги наметна Доналд Трамп ги прават германските производи поскапи за американските купувачи, а извозот кон Кина е во пад. „Огромниот пад на извозот во САД неодамна силно ја погоди германската индустрија“, предупредува Јан Брорхилкер од EY.
Под ваков товар, гигантите како Mercedes-Benz, Volkswagen, Bosch, Continental и ZF веќе најавуваат остри програми за намалување на трошоците. Porsche дури планира речиси целосно да го затвори својот батериски бизнис Cellforce. EY предупредува дека со масовните падови на профитот, прекумерните капацитети и слабеењето на странските пазари, сериозните кратења на работни места стануваат неизбежни – особено во Германија, каде што се концентрирани управувачките и развојните функции.
Но ударот не го чувствува само автомобилската индустрија. Во последната година исчезнале над 17.000 работни места во машинското инженерство и повеќе од 12.000 во металната индустрија. Само хемискиот и фармацевтскиот сектор успеале да ја избегнат големата чистка.
Иако на долг рок бројот на вработени во индустријата е сѐ уште повисок отколку пред една деценија, трендот е јасен и вознемирувачки. Се очекува намалувањата да продолжат и во наредните години, бидејќи ефектите од програмите за кратење на трошоците допрва ќе се одразат во статистиката. Тоа значи тежок удар и за новата генерација инженери – автомобилската и машинската индустрија денес вработуваат многу помалку млади луѓе, а пазарот на труд за дипломираните студенти станува непријатен. За првпат по долго време, Германија може да се соочи со пораст на невработеноста токму кај младите образовани кадри.
