Генералниот штрајк на УЈП одложен, двочасовниот протест продолжува

Генералниот штрајк засега не е опција за вработените во Управата за јавни приходи, а секојдневните двочасовни протести продолжуваат.

Штрајкот е одожен поради тоа што назначениот помирувач Лазар Јовевски побарал изземање затоа што е во странство и не може да се врати во предвидениот рок во кој треба да преговара со Министерството за финансии. Денес ќе биде предложен нов медијатор од страна на Синдикатот на УЈП.

Вработените не отстапуваат од барањето за триесетпроцентно зголемување на платите. Тоа, како што тврдат, им следува согласно актуелниот Колективен договор. Според кој, пред неколку месеци и вработените во Министерството за финансии добија повисоки плати.

Протестот со прекин на работата од 10 до 12 часот се одвива веќе трета недела. Во тој период од владините претставници постојано се посочува дека решението е во новиот општ колективен договор и новата методологија, со што ќе се регулираат платите во јавниот сектор. Ова ќе биде на дневен ред на состанокот на Економско социјалниот совет закажан за четврток.