Фити: Приоритет се забрзаниот раст, евроинтеграциите и борбата со сивата економија

Забрзување на економскиот раст и развој, продолжување на евроинтеграцискиот процес и борба против корупцијата, се трите клучни приоритети на кои треба да се фокусира новата влада, смета академикот Таки Фити. Воедно, советува, мора да се продолжи со реформите, но и да се отвори широк фронт за борба против сивата економија.

За проблемот со инфлацијата посочи дека монетарната и фискалната политика мора да се координираат. Вели, ако има фискална недисциплина и ако буџетот троши многу, нема централна банка што може да ја спречи инфлацијата.

„Ние тука имаме проблем – големи буџетски дефицити поради кризата, големи трошења, зголемување на просечната и минималната плата надвор од движењата на продуктивноста, голема увозна зависност и поголема инфлација во однос на земјите од регионот. Не може да одржиме висока ценовна, макроекономска и финансиска стабилност без дисциплинирана фискална политика. Новата влада мора да води сметка за тоа“, нагласува Фити и додава дека примарни активности треба да и бидат забрзувањето на економскиот раст и развој, продолжување на евроинтеграцискиот процес и борбата против корупцијата.

„Тоа се основните приоритети и се сосема добро профилирани или ставени на маса високо во агендата на програмата на идната влада. Голема врева меѓу економистите крена прашањето за едната милијарда. Често ме прашуваат за мислење, јас им реков – немам коментар околу тоа, а не е ни многу коректно“, е ставот на академикот, кој пренесува МИА, вели дека не може да се зборува кога нема информации.

Академикот Фити предупредува дека Буџетот е во тешка ситуација, но потенцијал има во сивата економија, за што е потребна борба.

„Имаме висок долг, треба да се отвори широк фронт на борба против сивата економија. Таму има огромен потенцијал да ги зголемиме буџетските приходи за да може владата полесно да управува со фискалната политика, а тоа може да ја олесни координацијата со монетарната политика“ нагласи Фити.

Сѐ што се случува надвор, на макроекономски план, има големо значење и висока релевантност за земјава, вели Фити, укажувајќи на последиците од кризата од 2007 до 2009 година, по што следуваа нови удари и падови. А, „ЕУ е битна за нас затоа што е наше релевантно подрачје на увоз и извоз, но и курсот на денарот е врзан со еврото“. Притоа, потенцира – до 2007 имавме учество на јавниот долг во БДП околу 23 отсто, па за пет-шест години дојдовме на 26 проценти, а денес, како резултат на двете кризи, над 60 отсто е учеството на јавниот долг.

Академикот, одговарајќи на новинарски прашања пред почетокот на научната расправа во МАНУ, препорачува Фискаланиот совет да контролира како се трошат буџетските средства, дали и колку се почитуваат основните буџетски правила – долгот да не биде поголем од 60 отсто, буџетските дефицити да се сведат на два до три проценти, за пет-шест години да дојдеме до нормално ниво на задолженост.

„Макроекономијата по Големата рецесија 2007 – 2009 година – релевантноста на промените за економската наука и за македонската економија“ е насловена научната расправа во организација на Центарот за стратегиски истражувања „Ксенте Богоев“ при МАНУ. Дискусиите на учесниците ќе бидат објавени во посебен Зборник на трудови од научната расправа.