ЕУ и Бил Гејтс ќе вложат една милијарда долари заедно во проект за иновации во технологијата

ЕУ и американскиот милијардер Бил Гејтс, планираат заеднички да инвестираат во фондот и тоа износ од една милијарда долари за воведување на технологии на низок јаглерод.

Овие технологии и се потребни на Унијата за постигнување на целите за климатските промени.

„Овие средства ќе бидат насочени кон производство на водород од обновливи извори на енергија, одржливи воздухопловни горива, технологии за отстранување на СО2 од атмосферата и долгорочно складирање на енергија“, објави денеска Европската комисија.

Гејтс во изјавата рече дека декарбонизацијата на глобалната економија е најголемата можност за иновации што светот ги видел и дека очекува Европа да има клучна улога во процесот, благодарение на климатските амбиции и лидерството во науката и технологијата.

ЕУ се обврзува да има вкупно нулта емисии штетни гасови до 2050 година, а овие инвестиции ќе се фокусираат и на градење големи комерцијални проекти за намалување на трошоците за воведување нови технологии.

Тие ќе содржат грантови и други финансиски инструменти, при што придонесот на ЕУ ќе доаѓа од постојните фондови, вклучувајќи го буџетот на Унијата и Фондот за иновации на ЕУ, а компанијата на Гејтс „Breakthrough Energy Ventures“ би го поддржала тоа за истата сума така што преку фондот Breakthrough Energy Europe (BEE), од 2022 до 2026 година, заеднички ќе се обезбедат до 820 милиони евра или една милијарда долари.