Аналитика
Apple ќе мора да го смени конекторот на iPhone уредите што се продаваат во Европа до 2024 година, откако земјите од ЕУ и законодавците во вторникот се согласија за единствена порта за полнење на мобилни телефони, таблети и камери во светот за прв пат. Политичката интервенција, за која Европската Kомисија рече дека e со намера за да им го олесни животот на потрошувачите и да им заштеди пари, дојде откако компаниите не успеаја да постигнат заедничко решение.
Брисел се залага за единствена порта за полнење на мобилни телефони повеќе од една деценија, поттикната од поплаките од корисниците на iPhone и Android дека мора да се префрлат на различни полначи за нивните уреди. Ајфоните се полнат од Lightning кабел, додека уредите базирани на Android користат USB-C конектори.
Половина од полначите продадени со мобилни телефони во 2018 година имале USB micro-B конектор, додека 29% имале USB-C конектор и 21% Lightning конектор, според студијата на Комисијата од 2019 година. „До есента 2024 година, USB Type-C ќе стане заедничка порта за полнење за сите мобилни телефони, таблети и камери во ЕУ“, се вели во соопштението на Европскиот парламент.
Шефот на индустријата на ЕУ, Тиери Бретон, рече дека договорот ќе заштеди околу 250 милиони евра за потрошувачите. „Тоа, исто така, ќе овозможи нови технологии како што е безжичното полнење да се појават и да созреваат без да дозволиме иновациите да станат извор на фрагментација на пазарот и непријатности на потрошувачите“, рече тој.
Епл, кој предупреди дека предлогот ќе им наштети на иновациите и ќе создаде планина од електронски отпад, не одговори веднаш на барањето за коментар.
„Горди сме што се вклучени и лаптопи, е-читачи, слушалки, тастатури, компјутерски глувци и преносни уреди за навигација“, рече пратеникот Алекс Агиус Салиба, кој ја водеше дебатата во парламентот.
Лаптопите ќе треба да се усогласат со законската регулатива во рок од 40 месеци од нејзиното стапување во сила. Извршната власт на ЕУ ќе има моќ во иднина да ги усогласува системите за безжично полнење.
Фактот дека договорот опфаќа и е-читачи, слушалки и други технологии ќе влијае на Samsung, Huawei и други производители на уреди.
