Аналитика
Есенската сеидба е веќе почната кај некои култури, а кај некои е веќе при крај. Кај многу култури, првата фаза – никнење, е многу значајна за нормален склоп и почетен развиток. Но, доколку има отсуство на врнежи може негативно да влијае врз сеидбата на есенските култури и нивно поникнување. Во вакви услови, доколку културите поникнат, влегуваат во зимата недоволно потготвени и може да претрпат штети од ниски зимски температури. Агролозите велат дека затоа е потребно залевање со мала залевна норма веднаш по сеидбата.
Растителните видови кои ги одгледуваме на отворено или во пластеници се изложени на ниски температури, а за да може што подолго да ги користиме или да ги зачуваме во текот на зимата, потребна им е заштита.
За таа цел, земјоделците велат дека најчесто се користи агротекстил. Неговата предност е што е лесен материјал кој не ги оптоварува и оштетува растенијата, пропушта вода и светлина и овозможува циркулација на воздухот. Растенијата што ги покриваме продолжуваат да растат и да се развиваат.
Најчесто се заштитуваат грмушките рози, овошјето и четинарите, виновата лоза, украсните растенија. Од зеленчукот најчесто се покрива спанаќот, младиот кромид, празот и зелената салата, но и други култури како ротквици, рукола, магдонос и зелка.
-Се изработуваат од полипропиленски влакна и имаат различни намени. Во зима најчесто се користи зимски бел агротекстил кој штити од мраз и студен ветер и не дозволува температурни флуктуации во зоната на покриените растенија. Неговата дебелина е 50 г/м². Температурата под неа е за 5ºC повисока од околината. Почвата под агротекстилот преку ден се загрева побавно, но и ноќе побавно се лади. Температурните осцилации се помали, а растението има способност да се прилагодува на промените. Наводнување, доколку е потребно, може да се врши и преку покривката.
Постигнува одлични резултати во производството на зелка, зелена салата, рукола, спанаќ, но и грав, млад кромид, блитва и ендивија.
