Аналитика
Претседателот на Регулаторната комисија за енергетика Марко Бислимовски во поткастот „Каде се парите“ изјави дека тој лично е против враќање на 1 јули на данокот на додадена вредност за електрична енергија од сегашните 10% на 18%. Смета дека се уште енергетската криза не е во потполност завршена и дека задржувањето на пониската стапка на овој данок ќе остави простор за подобро превенирање на можни идни енергетски шокови.
„Ако ме прашувате мене лично, јас сметам дека би било добро да се почека со промената на ддв – то бидејќи се уште немаме целосно стабилизирани цени на електрична енергија и на природен гас и во Европа и во Македонија. Предвидувањата се еве баш денес HUDEX за фјучерсите за во 2024 година цена на електрична енергија, тоа е на унгарската берза се околу 160 евра за мегават час“, вели Бислимовски и додаде дека оваа цена е три пати поголема од 2021 година.
Исто така тој истакна и дека долгот што го имаат кон ЕВН од 50 милиони евра настанат бидејќи оваа компанија за време на врвот на енергетската криза набавуваше струја за технички загуби по многу високи цени, а кои Комисијата не ги вметна во трошоците за да нема зголемување на цената на струјата за граѓаните, ќе бидат враќани по 10% годишно. Бислимовски смета дека сепак нема да требаат 10 години за да се расчисти долгот кон ЕВН, туку овој период ќе биде пократок и компанијата ќе си ги добие овие 50 милиони евра побрзо.
Г. Т.
