Државни субвенции за фотонапонските централи, за домаќинствата максимум 80 илјади денари

Прв пат годинава Министерството за економија ќе субвенционира вградување фотонапонски електроцентрали во домаќинствата. За таа намена се предвидени 30 милиони денари за повеќе од 400 домаќинства, кои ќе добијат поврат до 30 проценти од инвестицијата, но не повеќе од 80 илјади денари, најави министерот Крешник Бектеши. Владата продолжува со субвенциите за ПВЦ и алуминиумски прозорци и за сончеви колектори. Буџетот наменет за програмата за обновливи извори за енергија и за поттикнување енергетска ефикасност за годинава не само што не е скратен, туку е зголемен и изнесува 70 милиони денари.

„За надомест на дел од трошоците за купени или вградени ПВЦ или алуминиумски прозорци во домаќинствата се предвидени вкупно 25 милиони денари, за над 1.200 домаќинства“, рече Бектеши, додавајќи дека повратот на средства ќе биде до 50 отсто од трошокот, но не повеќе од 20 илјади денари по домаќинство.

„За вградување сончеви термални колекторски системи предвидени се 15 милиони денари за над илјада домаќинства. Кофинансирањето е до 30 проценти, но не повеќе од 15 илјади денари по домаќинство“, појасни министерот.

За третата мерка која прв пат ќе се реализира – надомест на дел од трошоците за купување и инсталирање фотонапонски електроцентрали за производство на електрична енергија до 6 киловати, посочи дека е во согласност со новата одлука на Министерството за економија во делот на зголемување на капацитетот на инсталирана моќност во секое домаќинство.

„Тука се предвидени 30 милиони денари и ќе се опфатат над 400 домаќинства. Повратот ќе биде до 30 отсто, но не повеќе од 80.000 денари“, нагласи министерот Бектеши. Освен тоа, наведе, согласно новиот Правилник и останатите законски акти, обврска на универзалниот снабдувач на електрична енергија е да го преземе произведениот вишок енергија од домаќинствата, да им ја плати произведената енергија или да им ја надомести на оние кои ќе се одлучат за вакви инвестиции.

За Струмица и Куманово, каде што веќе има мрежа за природен гас, предвидени се субвенции за приклучок на мрежата во висина од 70 проценти од трошокот, но не повеќе од 25.000 денари.

Што се однесува до стопанството, ресорното Министерство за економија до крајот на мај ќе ги кофинансира сите инвестиции во обновливи извори на енергија за сопствени потреби или за производниот процес. Конкретно, ќе надоместува 20 отсто од трошоците.