Аналитика
Вкупна добивка од 5.163.576.803 денари или 83,86 милиони евра оствариле во првите три месеци од годинава 66 друштва кои котираат на Берзата. Резултатот е за 10,96 проценти подобар од истиот лански период, кога 63 компании имале заеднички 4.653.470.502 денари, односно 75,58 милиони евра.
Од 94 друштва кои котираат на Македонска берза, според официјалниот преглед на финансиските податоци за првиот квартал, загуби забележале 23. Се работи за вкупен минус од 453.802.563 денари (7,37 милиони евра). Сегашната слика е подобра, бидејќи лани од јануари до март во негатива од 583.713.601 денар (9,48 милиони евра) биле 27 компании.
Оттаму и вкупна нето добивка во износ од 4.709.774.240 денари или 76.581.695 евра, која е за 16,10 насто над минатогодишната во првото тримесечје (4.056.695.901 денари/65.962.535 евра)
Од аспект на големината на добивката, меѓу најдобрите пет друштва, на првите места се позиционирани три банки.
Предводник, со 19,15 милиони евра реализирани од работа во само три месеци е Комерцијална банка. Во берзанскиот преглед е наведено дека остварувањето од 1.179.098.000 денари е за 13,41 процент повисоко од ланските 1.039.695.000 денари (16,88 милиони евра).
Следи најстарата банка. Скопската Стопанска банка во овој состав има најголемо зголемување на профитот – за 23,35 проценти. Во првиот картал износот е 861.948.000 денари (13,99 милиони евра), додека минатогодишниот бил 698.799.573 денари (11,34 милиони евра).
Висока добивка, но за 15,48 отсто пониска од споредбениот период бележи НЛБ банка: 678.296.000 денари (11 милиони евра) наспроти 802.487.000 денари (13 милиони евра).
Во првата петорка се и две компании. „Македонски телеком“ со профитот од 550.670.060 денари (8,94 милиони евра) и со раст од 15,18 насто и „Алкалоид“ со остварената добивка од работењето – 479.529.000 денари, односно 7,78 милиони денари, поголема за 8,59 проценти од ланските први три месеци.
Инаку, од сите компании на Берзата, само една не го објавила финансискиот извештај по одработеното годинешно прво тримесечје.
М.А.
