Аналитика
Иако ЕУ го блокираше својот најголем снабдувач со дизел гориво, цените на фјучерсите на дизелот во блокот паднаа за 1,6% во понеделникот, што претставува загуба од 20% во текот на изминатите две недели, бидејќи побарувачката во регионот опаѓа и напорите на земјите да складираат залихи пред забраната почнаа да се исплатат.
Намалувањето на цената ќе значи олеснување за милиони камионџии, возачи и бизниси на континентот кои се потпираат на дизелот. Околу 96% од камионите, 91% од комбињата и 42% од патничките автомобили во Европската Унија работат на вакво гориво, според Европската асоцијација на производители на автомобили.
„Очекувањата беа дека, кога ќе дојде забраната, снабдувањето со дизел во Европа ќе се затегне, но, всушност, тоа во моментов не се случува“, изјави за Си-Ен-Ен Марк Вилијамс, истражувачки директор во консултантската компанија Вуд Мекензи.
Забраната за дизелот доаѓа два месеци откако блокот постави ембарго на увоз на сурова нафта од Русија преку море, како дел од пакетот санкции против Москва поради нејзината инвазија на Украина. Русија сочинуваше 29% од вкупниот увоз на дизел во регионот минатата година, покажуваат податоците на Ристад енерџи.
Земјите се подготвија за најновата забрана со зголемување на увозот на московскиот дизел во последните месеци. Увозот во Европа е зголемен за речиси 19% во четвртиот квартал од 2022 година во споредба со истиот период претходната година, според давателот на енергетски податоци Vortexa.
„Тие залихи треба да дејствуваат како тампон против непосредната загуба на рускиот увоз на дизел“, рече Вилијамс.
Намалена побарувачка
Побарувачката во целиот блок е исто така слаба. Податоците од OilX, аналитичка компанија за нафта, покажуваат дека побарувачката за дизел во Европа е намалена помеѓу почетокот на ноември и крајот на јануари во споредба со истиот период претходната година.
Аналитичарите делумно го објаснуваат падот на потоплото време од вообичаеното во регионот, каде што дизелот исто така се користи како гориво за греење, и високите цени. И покрај неодамнешните падови, цените на големо се уште се 10% над нивното ниво во исто време минатата година.
На пумпата, просечната цена на литар дизел во ЕУ достигна 1,80 евра на 30 јануари, во однос на 1,60 евра во исто време минатата година, покажуваат податоците на Европската комисија.
Нил Крозби, висок аналитичар во OilX, изјави за Си-Ен-Ен дека „постојаните слаби податоци за побарувачката“ во Европа и помогнале „суштински да ги зголеми залихите на бензин во последните неколку месеци“. Сепак, може да бидат потребни неколку месеци за да се почувствува целосното влијание на забраната, бидејќи Европа ќе почне да увезува повеќе дизел од добавувачи подалеку, со што се направени повисоки трошоци за испорака.
Блокот веќе увезува значително поголеми количини на дизел од САД, Блискиот Исток и делови од Азија, според Вилијамс во Вуд Мекензи.
И покрај тоа, тој увоз нема да биде доволен за да се „компензира загубата на руски барели во Европа“, откако Европа ќе ги намали залихите, рече тој, додавајќи дека цените во однос на другите региони увозници би можеле да почнат да растат од третиот квартал оваа година.
РУСИЈА ГО ПРЕНАСОЧУВА ИЗВОЗОТ
Влијанието на забраната врз Русија, исто така, може да биде огромно. Москва успеа да пренасочи поголем дел од својот дизел на други пазари од јули минатата година. Извозот во Турција и Северна Африка се зголеми за 154 отсто меѓу ноември и јануари во споредба со истиот период претходната година, според Ристад енерџи.
Хорхе Леон, виш потпретседател во фирмата, гледа дека овој тренд продолжува, изјави тој за Си-Ен-Ен, исто така предвидувајќи дека рускиот извоз во Јужна Америка веројатно ќе остане на „маргинално“ ниво.
Сепак, тој додаде дека Соединетите Држави би можеле да пренасочат дел од својот сегашен извоз на дизел во Јужна Америка во Европа, а рускиот дизел потоа „да си најде дом“ во Јужна Америка.
Крозби од OilX истакна дека има „многу повеќе“ потенцијални купувачи на московскиот дизел во споредба со извозот на сурова нафта.
„Повеќето руски пратки со дизел ќе успеат да стигнат до глобалните пазари“, рече тој. „Идејата дека рускиот дизел ќе има мака да најде нови дестинации почнува да го губи кредибилитетот“.
