Аналитика
Историската мисија Artemis II заврши со успешно слетување на астронаутите во Тихиот Океан, со што човештвото направи нов чекор кон враќањето на Месечината.
По речиси 10 дена во вселената и патување од над 690.000 милји (околу 1,1 милион километри), капсулата „Орион“ безбедно се спушти во Пацификот, во близина на брегот кај Сан Диего.
Враќањето било еден од најкритичните моменти од мисијата. Леталото влегло во атмосферата со брзина поголема од 24.000 милји на час, при што топлинскиот штит издржал екстремни температури. Следувал краток прекин на комуникацијата, по што се отвориле падобраните и капсулата прецизно слетала во океанот.
Во капсулата се наоѓале четворица астронаути – Reid Wiseman, Victor Glover, Christina Koch и Jeremy Hansen – кои по слетувањето биле преземени од тимови на американската морнарица. Во рок од неколку часа биле извлечени од капсулата и пренесени на брод за медицински прегледи.
Мисијата не вклучуваше слетување на Месечината, туку обиколка околу неа и тестирање на системите за идните мисии. Астронаутите се доближиле на околу 4.000 милји од површината и поставиле рекорд за најголема оддалеченост од Земјата постигната од човек.
Успешното „прскање“ во Пацификот (splashdown) се смета за клучен тест за безбедноста на вселенското летало и процедурите за враќање, кои ќе бидат основа за следната фаза – мисијата „Артемис 3“, планирана со слетување на Месечината во наредните години.
Со ова, „Артемис 2“ го означи првото враќање на луѓе од длабоката вселена по повеќе од 50 години и ја отвори вратата за нова ера на човечко присуство надвор од Земјата.
(Фото: NASA/Bill Ingalls)
