Аналитика
Кина и САД се согласија да ги продолжат своите царински паузи една кон друга, што го потврди и највисокиот трговски претставник на Кина во вторник во Стокхолм, по дводневниот состанок со американските претставници.
Во разговор со печатот, Ли Ченгганг рече дека двете страни имале „конструктивни“ и „искрени“ дискусии и се согласиле да ги задржат тарифите на сегашното ниво – САД ќе оданочуваат кинески стоки од 30%, а Кина ќе собира 10% од американските производи.
Меѓународниот трговски претставник на Кина, Ли Ченгганг, изјави дека двете страни имале „длабоки, искрени и конструктивни“ разговори и се согласиле да работат на продолжување на паузата во царините по 12 август, кога истекува рокот за постигнување трговски договор.
„Двете страни се целосно свесни за важноста од одржување на стабилни и здрави економски и трговски односи меѓу Кина и САД“, рече Ли, без да наведе детали за тоа како би изгледало продолжувањето.
Американскиот секретар за трезор, Скот Бесент, ги опиша разговорите како „многу содржаен дводневен дијалог со кинеската делегација“.
Тој рече дека се разговарало и за американските грижи околу купувањето иранска нафта од страна на Кина, испораките на двојно наменета технологија на Русија што може да се користи на бојното поле, и производството на стоки со стапка што ја надминува глобалната побарувачка.
„Ние само сакаме да го намалиме ризикот во одредени стратешки индустрии, без разлика дали станува збор за редки земји, полупроводници или лекови. Разговаравме што можеме да направиме заедно за да ја вратиме рамнотежата во односите“, рече Бесент.
Тој нагласи дека САД сакаат да ја обноват домашната индустрија, да обезбедат договори за купување американски земјоделски и енергетски производи и да го намалат трговскиот дефицит.
Најновиот круг разговори започна во понеделник во Стокхолм со цел да се пробие ќор-сокакот околу царините кои ги нарушија клучните трговски врски меѓу двете најголеми економии во светот.
Двете страни претходно се сретнаа во Женева и Лондон за да решат конкретни прашања — царини со троцифрени стапки кои претставуваа трговско ембарго и извозни контроли на критични производи — контролата на Кина врз редките магнети и ограничувањата на САД за полупроводници.
Разговорите во Стокхолм се одвиваа додека претседателот Доналд Трамп размислува за средба со кинескиот претседател Си Џинпинг — самит што би можел да биде клучен чекор за постигнување некаков поголем договор меѓу двете земји.
Бесент изјави дека самитот не бил тема на разговорите во Стокхолм, но дека било разговарано за „желбата на двајцата претседатели нивните трговски и финансиски тимови да водат преговори со кинеските партнери.“
Грир рече дека американскиот тим ќе се врати во Вашингтон и ќе „разговара со претседателот“ за можноста за продолжување на рокот по 12 август и ќе види „дали тоа е нешто што тој сака да го направи.“
САД имаат постигнато договори околу царините со некои од клучните трговски партнери — вклучувајќи ги Британија, Јапонија и Европската Унија — откако Трамп претходно во јули најави зголемени царини против десетици земји. Кина останува можеби најголемиот предизвик.
„Кинезите беа многу прагматични,“ рече Грир во коментар објавен на социјалните мрежи од неговата канцеларија доцна во понеделникот. „Имаме тензии сега, но фактот што редовно се среќаваме со нив за да ги решиме овие прашања ни дава добра основа за преговорите.“
Многу аналитичари очекуваа дека разговорите во Стокхолм ќе резултираат со продолжување на постоечките царински стапки, кои се многу пониски од троцифрените стапки предложени кога трговската расправија достигна врв во април и предизвика привремено потресување на светските пазари.
Двете страни се повлекоа од работ на амбисот за време на билатералните разговори во Женева во мај и се согласија на 90-дневна пауза — што завршува на 12 август — од тие енормни царински стапки. Во моментов, САД применуваат 30% царина на кинески стоки, додека Кина има 10% царина на американски производи.
Иако Кина даде малку детали за своите цели во разговорите во Стокхолм, Бесент сугерираше дека ситуацијата се стабилизирала доволно за Пекинг и Вашингтон да можат да почнат да гледаат кон подолгорочна рамнотежа меѓу нивните економии.
Венди Катлер, поранешна американска трговска преговарачка и сега потпретседателка на Азија друштвото за политички прашања, рече дека тимот на Трамп денес се соочува со „голем и самоуверен партнер кој е повеќе од подготвен да возврати против американските интереси.“
Продолжувањето на царинските стапки „треба да биде лесниот дел,“ рече таа, предупредувајќи дека Пекинг извлекол лекции од првата администрација на Трамп и „нема повторно да прифати едностран договор.“
