Аналитика
Новиот извештај на инвестициската банка „Credit Suisse“, открива дека пандемијата на корона вирусот, доведе до пад на индивидуалното богатство ширум светот, но падот е помал од предвидувањата.
Богатството на домаќинствата во Кина и Индија претежно му пркоси на овој „тренд“. Според студијата, 2019 година била добра година во однос на создавањето богатство. Вкупното глобално богатство се зголеми за 36,3 трилиони долари, додека богатството по возрасен се зголеми за 8,5 проценти во споредба со 2018 година.
Ова, исто така, помогна да се ублажат ефектите од „Ковид-19“. И покрај превирањата на берзата, забележани во пролетта 2020 година, богатството на домаќинствата сега е малку над нивото забележано на почетокот на годината, се наведува во извештајот. Акциите на владите и централните банки помогнаа да се ублажат ефектите од пандемијата, бидејќи глобалното богатство се опорави од првичниот пад во првиот квартал од годината, и сега изнесува скоро 400 трилиони долари.
„Со оглед на штетата што Ковид 19 и ја нанесе на глобалната економија, се чини неверојатно дека индивидуалното богатство помина релативно неповредено“ вели економистот Ентони Шорокс, еден од авторите на извештајот банка „Credit Suisse“.
Извештајот покажа дека само Кина и Индија бележат раст на богатството на домаќинствата во првата половина на 2020 година, а тој раст е 4,4% и 1,6%, соодветно. Најмногу страдаше Латинска Америка, со пад од 13 проценти, бидејќи девалвациите на валутите ги влошија загубите во бруто домашниот производ.
