Аналитика
Би-би-си му се извини на Доналд Трамп за уредувањето на говорот во програмата на Панорама, но нема да плати отштета, објави Скај Њуз. Корпорацијата рече дека станува збор за „грешка во проценката“ и дека емисијата која одеше кратко пред минатогодишните претседателски избори – „нема повторно да се емитува во оваа форма на ниту една платформа на Би-би-си“.
Но, додаде дека „силно“ не се согласува дека постои „основ за тужба за клевета“.
Адвокатскиот тим на Трамп се закани дека ќе ја тужи Би-би-си за милијарда фунти освен ако не издаде „целосно и фер повлекување“ на програмата, не се извини веднаш и „соодветно“ не го обештети претседателот.
Белата куќа не даде коментар за одговорот на Би-би-си и му рече на Скај њуз да упати прашања до „надворешниот советник на претседателот за ова прашање“. Скај њуз чека одговор од советникот на претседателот.
Правниот тим на Доналд Трамп претходно откри дека американскиот претседател сè уште не поднел тужба против Би-Би-Си поради уредувањето на говорот што го одржал во 2021 година на денот кога неговите поддржувачи го зазедоа Капитол.
Правните експерти изјавија дека Трамп ќе се соочи со предизвици да го однесе случајот на суд во Велика Британија или САД.
Роковите за покренување на случајот во англиските судови, каде што штетите за клевета ретко надминуваат 100.000 фунти (132.000 американски долари), истекоа пред повеќе од една година.
Бидејќи документарецот не беше прикажан во САД, би било тешко да се докаже дека Американците го сметаат за значајно поради програма што не можеа да ја гледаат.
ОДГОВОРОТ НА БИ БИ СИ
Во соопштението, корпорацијата соопшти дека адвокатите на Би-Би-Си му пишале на правниот тим на г-дин Трамп. Претседателот на Би-Би-Си, Самир Шах, напиша лично писмо до Белата куќа, „јасно ставајќи до знаење“ дека тој и корпорацијата „се извинуваат за уредувањето на говорот на претседателот на 6 јануари 2021 година“.
„Би-Би-Си нема планови да го реемитува документарецот „Трамп: Втора шанса?“ на која било платформа на Би-Би-Си“, се додава во соопштението. „Иако Би-Би-Си искрено жали за начинот на кој е монтиран видеоклипот, ние силно не се согласуваме дека постои основа за тужба за клевета.“
Би-Би-Си, исто така, соопшти дека ги испитува новите обвинувања, објавени во „Телеграф“, дека нивната емисија „Њузнајт“, исто така, селективно монтирала снимки од истиот говор во извештај емитуван во јуни 2022 година.
Портпарол на Би-Би-Си изјави: „Би-Би-Си се држи до највисоките уреднички стандарди. Ова прашање ни е доставено до вниманието и сега го разгледуваме.“
Во неделата вечерта, двајца од врвните личности на Би-Би-Си, вклучувајќи го и генералниот директор, поднесоа оставки поради расправијата околу монтирањето и загриженоста за непристрасноста.
„Извинувањето до г-дин Трамп беше правилно. Малкумина во новинарството би го бранеле едитирањето што го емитуваше „Панорама““, се вели во еден од многуте уреднички коментари во британските медиуми по повод најавената тужба на Трамп кон Би Би Си. „Но, подеднакво важно беше корпорацијата да го искористи овој момент за да застане зад своите новинари – и тоа го направи“.
