БАНКАРИТЕ НАЈДОМИНАНТНИ, НАФТАШИТЕ СЕ ВРАЌААТ ВО ИГРА: Како сработија котираните компании во првиот квартал од 2022?

Македонските компании кои котираа на Македонска берза сработија одличен прв квартал ако се земе во предвид отежната ситуација во која работат- се уште активна пандемија, војната во Украина и ефектите врз светската економија, зголемени берзански цени, отежнато снабдување, помалку пари на располагање…

Котираните компании се во ќар 5,3 милиони евра повеќе во однос на лани прв квартал. Ова го покажуваат пресметките на добивките и загубите во финансиските резултати на вкупно 91 котирана компанија, а кои сумирано ги објави берзата.

Вкупната добивка на котираните компании за првите три месеци годинава изнесува 66,2 милиони евра. Минатата година за истиот период профитот на овие компании бил 58,5 милиони евра. Иако вкупната заработка е зголемена, финансиските резултати покажуваат пораст и на вкупната загуба. Минусот што го пријавиле котираните компании се продлабочил на 6,5 милиони евра, а во 2021 во првото тримесечие изнесувал 4,1 милион евра.

Податоците покажуваат и дека во првиот квартал 62 компании пријавиле добивка што е помалку за две во однос на лани. Истовремено со загуба работеле 28 фирми или за една повеќе од 2021-ва.

Банките остануваат најдоминантни меѓу котираните компании на Македонската берза. Извештајот за финансиското работење во првиот квартал од 2022 година, на вкупно 91 котирана компании покажуваат дека не само што и натаму имаат најголема добивка туку успеале да остварат и раст кој се движи од 30 до 45 проценти раст во однос на првите три месеци лани. Освен банките кои цврсто стојат на своите позиции, нафтените компании направиле значителен пробив во првото тримесечие. Нивните добивки пораснале за дури пет пати. Секако голем удел во нафтениот бизнис има и инфлацијата и поскапувањето на суровата нафта, а со тоа и на малопродажната цена.

ПЕТТЕ КОМПАНИИ СО НАЈГОЛЕМА ДОБИВКА ЗАЕДНО ЗАРАБОТИЛЕ 42,8 МИЛИОНИ ЕВРА

Најдобар резултат меѓу котираните компании со добивка од 10,8 милиони евра остварила Стопанска банка. Веднаш зад неа е НЛБ Банка која пресметала профит од 10,6 милион евра. Од банките Комерцијална банка прикажала најголем раст од над 45 проценти во однос на лани при што запишала добивка од 8,5 милиони евра.

Нафтените компании одлично поминале во првиот квартал. Рафинеријата ОКТА  со добивка од 7 милиони евра се искачи на високата 4-та позиција. Стабилен бил и фармацевтскиот сектор. И Алкалоид го надмашил ланскиот профит остварувајќи добивка од 5,9 милиони евра.

КОМПАНИИ СО НАЈГОЛЕМ РАСТ НА ДОБИВКАТА

Индустрија, трговија со нафтени деривати, услуги се секторите кои покажале најголем раст на добивките иако во апсолутни бројки заработката и не е толку висока освен кај Макпетрол. Нафтената компанија успеала да оствари за пет пати поголем профит во првиот квартал годинава во однос на ланскиот. Добивката на оваа компанија изнесува 2,9 милиони евра, додека лани забележала профит од 598 илјади евра.

Од друга страна секторите градежништво и угостителство остануваат едни од најпогодените сектори. Компанија која пријавила најголема загуба меѓу котираните компании е Бетон АД Скопје. Градежната фирма пријавила 2,4 милиони евра загуба.

Втор на листата со еден милион евра загуба е Тутунски комбинат АД Прилеп. И Жито Лукс е третата фирма со најголема загуба меѓу котираните од 521 илјада евра.

Редакција Пари

Преземањето на авторски содржини (текстови и фотографии) од оваа страница е дозволено само делумно и со ставање на хиперлинк до содржината што се цитира.