Авиокомпаниите сепак ќе ги вратат парите за откажаните летови

Група европски авиокомпании најави дека ќе им враќа пари на патниците чии летови беа откажани за време на пандемијата на Ковид -19 и се обврза дека ќе обезбеди подобри информации за правата на патниците во иднина, пренесува Ројтерс.

По разговорите со Европската комисија, 16 авиокомпании се согласија дека подобро ќе ги информираат патниците кога компаниите ќе ги откажат летовите и ќе понудат ваучери само кога патниците ќе ги изберат.

Меѓу авиокомпаниите што постигнаа договор, меѓу другите се и Ер Франс – КЛМ, Бритиш ервејс, Изијет, Луфтханза, ТАП и Виз ер.

Неприфатливо однесување на авиокомпаниите

„Во раните фази на пандемијата, некои авиокомпании едноставно им дадоа само ваучери на патниците“, се сеќава европскиот комесар за правда Дидие Рејндерс. Тој смета дека тие постапувале спротивно на правилата на Европската унија за заштита на потрошувачите, што ги смета за „неприфатливи“.

Националните власти во одделни членки на Унијата се одговорни за спроведување на заедничките правила за заштита на потрошувачите, пренесува Танјуг.

Уредбата за соработка во заштитата на потрошувачите создаде мрежа на државни извршители за координација по вакви прашања.

„Авиокомпаниите ги прекршија европските права на потрошувачите на високо ниво за време на пандемијата“, рече Моник Гојенс, генерален директор на Европската организација на потрошувачи, која поднесе жалба до Европската унија кон средината на минатата година.