Аналитика
Би сакала да ја известам јавноста дека на иницијатива на Народната банка, којашто беше поддржана и од другите централни банки од регионот, Европската централна банка воспостави финансиски инструмент којшто можат да го користат централните банки од земјите коишто не се дел од еврозоната.
На овој начин, ЕЦБ направи голем исчекор, за првпат овозможувајќи ѝ на нашата централна банка пристап до финансиски средства, и тоа во износ до 400 милиони евра, во форма на репо-трансакција, за периодот до средината на следната година, или додека е потребно. Преку Народната банка, овие средства ќе можат да ги користат деловните банки.
Ова е голема поддршка за нас, бидејќи во условите на пандемијата на ковид-19, ни се става на располагање значајна девизна ликвидност во евра, во функција на натамошно зајакнување на макроекономската стабилност.
Позитивната одлука на ЕЦБ претставува потврда за здравите фундаменти на македонската економија, како и за нашата подготвеност како централна банка соодветно и навремено да одговараме на предизвиците од корона-кризата и успешно да ја одржуваме макрофинансиската стабилност.
Во име на тимот на Народната банка упатувам голема благодарност до ЕЦБ за укажаната доверба и дадената поддршка.
Народната банка и во условите на корона-кризата, продолжува да чекори по европскиот пат.
