Аналитика
Потребата од стабилизирање на инфлацијата и нејзино враќање кон претходните ниски стапки, фискалната консолидација и јакнење на отпорноста на финансискиот систем е приоритет на кус рок. На долг рок, потребни се политики коишто ќе обезбедат стабилна макроекономска и финансиска околина за одржлив и забрзан економски раст. Како значаен аспект и структурна реформа за јакнење на економскиот потенцијал се истакнуваат иновациите во дигиталната сфера во монетарниот и на финансискиот систем, имајќи превид дека иновациите во монетарната сфера секогаш биле двигателот на економската активност и раст. Ова произлезе на 92. годишно генерално собрание на БИС во Швајцарија, на кое учествуваше гувернерката на Народната банка, Анита Ангеловска-Бежоска.
Притоа, беа разгледани и усвоени најновиот Годишен извештај за работата на БИС и Годишниот економски извештај на БИС за 2023 година. Усвоениот Економски извештај се осврнува на три области: антиинфлациските политики, заедничкото дејствување на монетарната и на фискалната политика со цел одржување на стабилноста и довербата, како и идните движења во монетарниот систем. Во Извештајот се нагласува потребата од холистички пристап при конципирањето на монетарните, фискалните, макропрудентните и структурните политики, земајќи ја предвид сложеноста на тековните предизвици.
Гувернерката воедно учествуваше и на 22. годишна конференција на БИС, каде што вниманието беше свртено кон актуелните теми, односно централните банки, макрофинансиската стабилност и иднината на финансискиот систем, на која беше дискутирано за односите помеѓу монетарната и фискалната политика во контекст на макроекономската стабилност, пазарите на капитал, политиките на централните банки во смисла на пазарот на обврзници, а се дискутираше и за иднината на криптосредствата, додека акцентот на дискусиите беше ставен на одржувањето на монетарната и финансиската стабилност во времиња исполнети со предизвици, информираат од Народната банка.
Гувернерката оствари и билатерални средби со повеќе свои колеги од централни банки членки на БИС.
Банката за меѓународни порамнувања е најстара меѓународна финансиска институција. Нашата централна банка е полноправна членка со уште шеесет и две централни банки и монетарни власти од светот, кои учествуваат и имаат право на глас на генералното собрание, што говори за улогата на Народната банка како активен учесник во дебатите и анализите и носењето на дел од одлуките кои се клучни за монетарната политика и монетарните движења и во светски рамки.
