Аналитика
САД ги означија Швајцарија и Виетнам како валутни манипулатори, можеби еден од последните несакани ефекти на администрацијата на Трамп кон меѓународните трговски партнери.
Три нови имиња се додадени на списокот на земји осомничени за преземање мерки за девалвација на нивните валути во однос на американскиот долар.
Ова е прв пат од 2019 година САД да означат друга земја како валутен манипулатор кога ја обвинија Кина во време кога двете најголеми економии во светот беа во напнати трговски преговори.
Во својот годишен извештај во средата, Министерството за финансии на САД ги обвини Швајцарија и Виетнам дека интервенирале на девизните пазари до јуни 2020 година за да спречат ефективно прилагодување на платниот биланс.
Во првата реакција, Швајцарската национална банка (СНБ) соопшти дека нема да ја промени својата монетарна политика, иако Швајцарија беше прогласена за манипулатор со валути од страна на Министерството за финансии, додавајќи дека централната банка е сè уште подготвена да дејствува агресивно на девизните пазари.
„Интервенциите на девизниот пазар се неопходни во швајцарската монетарна политика со цел да се обезбедат соодветни монетарни услови, а со тоа и ценовна стабилност“, додаваат тие.
Швајцарската банка посочува дека наглото зајакнување на франкот би било штетно за економијата и има намера да продолжи со сегашната политика, која опфаќа широко купување на американски акции. Виетнам не ги коментираше обвинувањата на САД за манипулирање со курсот на донг.
