Амазон повторно руши рекорди, Безос убедливо најбогат човек на планетата

Амазон пред некој ден објави дека третиот квартал го заврши извонредно, благодарение на растот на купувањето преку Интернет.

Ова значи дека продажбата, заклучно со 30 септември, се зголеми за 37% во споредба со истиот период во 2019 година, на 96,1 милијарди долари, додека профитот се зголеми за 197 проценти, на 6,3 милијарди долари.

Резултатите ги надминаа очекувањата на Волстрит и не го вклучуваат славниот Prime Day, одржан на 13 и 14 октомври, кога вообичаено е најголемата побарувања за купување од Амазон.

И додека продажбата на Интернет растеше, во физичките продавници на Амазон, како што е „Хул фудс“, продажбата опадна за 10 проценти. Се претпоставува дека допрва претстои добар период за Амазон, поради празниците и зимата.

Имено, компанијата очекува продажбата во последниот квартал (октомври – декември) да се зголеми на ниво помеѓу 112 и 121 милијарди долари, а оперативниот профит да биде помеѓу една и 4,5 милијарди долари. Исто така, треба да се спомене дека акциите на Амазон скокнаа околу 70 проценти оваа година.

За потсетување, креаторот на Амазон, Џеф Безос, во моментов е најбогатиот човек на планетата, со нето вредност од близу 200 милијарди долари, и постојат сите шанси никој во блиска иднина да не го собори од власт.