Аналитика
„Алкалоид“ е најпосакуваната македонска компанија за вработување за 2022 година. Таму би сакале работно да се ангажираат дури 41 отсто од испитаниците опфатени со анкетатата на веб-порталот на Агенцијата за посредување при вработување „Вработување.ком“. Високиот процент произлегол од јавното анкетно истражување спроведено во периодот од 26 мај до 19 јуни минатата година, на примерок од 1.468 лица.
Наградата му беше врачена на Живко Мукаетов, генерален директор и претседател на Управниот одбор на „Алкалоид“, на манифестацијата конципирана како оскари за работодавците – „Работодавец на годината“, реализирана низ симболиката на 20-годишниот јубилеј на „Вработување.ком“.
Наградите за најпосакуван работодавец се доделуваат врз база на три критериуми: бројот на посети на огласите и на објавите на сајтот „Вработување.ком“, покажаниот интерес од апликантите и јавното анкетно истражување. На манифестацијата беа доделени награди во седум категории, а „Алкалоид“ ја доби наградата како апсолутен победник, односно се закити со титулата „Најпосакуван работодавец за 2022 – најпосакувана македонска компанија“.
Како компанија во чија деловна стратегија и во стратегијата за општествена одговорност луѓето се пред сѐ, од „Алкалоид“ нагласуваа дека ќе продолжат да одржуваат и да креираат високи професионални стандарди во работната средина. Која, претставува предизвик за сѐ повеќе млади професионалци кои тежнеат својата кариера да ја градат во сопствената земја.
