Турската лира на најниско историско ниво, еден долар изнесува 12,5 лири

Вредноста на турската лира е најниска во историјата – еден долар е речиси 12,5 лири. Падот на вредноста на оваа валута продолжи и денеска, со што ја надмина „психолошката“ граница од 11 лири.

Тим Еш од финансиската компанија Bluebay Asset Managment го коментираше слабеењето на турската валута.

„Лудилото е таму каде што е лирата, но тоа е резултат на лудата монетарна политика“, рече Еш.

Падот продолжи откако претседателот на оваа земја Реџеп Таип Ердоган повторно најави дека ќе инсистира на намалување на каматната стапка, сметајќи дека тоа ќе придонесе за ублажување на инфлацијата. Тој го опиша потегот како дел од „економската војна за независност“. Тој ги отфрли повиците на инвеститорите и аналитичарите за промена на економската политика.

Инфлацијата во Турција моментално е 20 отсто. Вредноста на лирата од почетокот на оваа година падна за 40 отсто, а само лани тој пад изнесуваше 20 отсто.

Според CNBC, тоа почнало да се случува во 2018 година, како резултат на комбинација на влошени геополитички односи со Западот, дефицити во тековната сметка, намалување на девизните резерви и растечки долг. Најзначајна причина е одбивањето да се зголемат каматните стапки.

Ердоган ги нарече каматните стапки „непријатели“. Инвеститорите стравуваат и дека централната банка на земјата станува се помалку независна. Со одлука на Ердоган од 2019 година до денес сменети се тројца гувернери. Поранешниот заменик гувернер Семих Тумен, кој беше сменет во октомври оваа година, го критикуваше Ердоган.

„Мораме да го напуштиме овој ирационален експеримент, за кој нема шанси да успее, и да се вратиме на квалитетна политика која ќе ја заштити вредноста на турската лира и благосостојбата на турскиот народ“, рече Тумен, пренесува CNBC. .

Владејачката Партија на правдата и развојот (АКП) на Ердоган со години го заснова својот успех на значителен економски раст, за кој Блумберг истакна дека често се заснова на намалување на кредитните трошоци. Поддршката за АКП почна да опаѓа поради економските проблеми предизвикани од пандемијата на коронавирус.