„СТОП“ ЗА РАЗГОЛЕНИ И ЗБЕСНАТИ ТУРИСТИ: Овој португалски град воведува забрана за непристојно облекување во јавност

Крајбрежниот град во јужниот португалски регион Алгарве, кој е посебно популарен кај британските туристи, го ревидира својот кодекс на однесување за експлицитно да им забрани на луѓето да бидат делумно или целосно голи во јавност. Следејќи ги сличните одлуки на неколку градови и туристички локалитети во Шпанија, Советот на Албуфеира во португалското место за одмор во Алгарве одлучи да воведе нови правила за „пристојност“ за 2025 година. Со оваа одлука се забранува употребата на бикини и костими за капење на јавните улици како дел од својот нов предложен Кодекс на однесување.

Според новите планови, секој што носи бикини или оди без маица на плажа може да биде казнет до 1.500 евра

Овие мерки се насочени кон оние странски туристи кои се чини дека претпоставуваат дека можат да прават или носат што сакаатна јавно место, но сега, според Correio da Manhã, 12 локални полицајци ќе имаат задача да ги спроведат многуте нови правила според кои туристите би можеле да плаќаат дебело за секое прекршување.

Документот, кој беше објавен во државниот весник Diário de República и ќе остане под јавна консултација 30 дена, содржи серија нови ограничувања насочени кон одржување на јавното однесување во градот под контрола.

Новиот Кодекс на однесување експлицитно им забранува на поединците да бидат во состојба на „делумна голотија“ на јавни површини, вклучувајќи улици, јавни простори и јавен превоз. Ограничувањата се однесуваат на терасите на претпријатијата, без разлика дали се наоѓаат на јавни или приватни простори, се додека тие се видливи од јавни површини. Списокот на забранети облеки вклучува бикини, трикини, костими за капење и слични облеки, како и гаќички и гаќи за капење. Прекршителите може да се соочат со парични казни од 300 до 1.500 евра, а општинската полиција е одговорна за спроведување, вели Советот.

Покрај ограничувањата за костими за капење, Советот воведува и мерки за забрана на пиење на улица. Новиот кодекс се обидува да го забрани консумирањето алкохол на јавните улици и плоштади – однесување кое стана премногу вообичаено во Албуфеира.

Во новиот документ е вклучена и забраната за напуштање на колички од супермаркети надвор од одредени области.

Кодексот на однесување, исто така, се однесува на вознемирувањата на јавноста, забранувајќи прекумерна бучава во станбените области.

Понатаму, документот предвидува одредени однесувања, како што се вклучување во сексуални дејствија, спиење, готвење или кампување на јавни места, ќе бидат строго забранети.

Сепак, советот појаснува дека овие правила нема да важат за плажите, местата за капење, хотелските отворени простори или местата за паркирање кои обезбедуваат пристап до овие зони.

Минатото лето, локалниот градоначалник Хозе Карлос Роло веќе изјави дека Советот зазема цврст став во „браната на добриот имиџ на Албуфеира“, при што локалниот совет работи на повеќе фронтови за да го „дисциплинира однесувањето на јавноста“. Целта беше „да се врати добриот имиџ на Албуфеира“, рече Роло, за доброто и на жителите и на туристите.

Албуфеира со оваа одлука се приклучува на релативно долгата листа на европски градови со слични закони, вклучувајќи ги Барселона, Дубровник и Ница.

Ова португалско градче е познато по прекрасни плажи и жив ноќен живот, но неговата репутација како дестинација за забава го наруши имиџот на Албуфеира.

Минатата година осум Британци биле снимени како танцуваат целосно голи во бар среде бел ден на Руа да Оура, главната улица во Албуфеира. Видеото стана вирално и португалската полиција успеа да ги идентификува туристите.

Ова поттикна итен состанок со локалниот совет, безбедносните сили и деловните субјекти, а градоначалникот Хозе Карлос Роло вети дека ќе го спречи „прекумерното“ однесување на туристите.

(Фото: УНН)