Регионот може да создава нова вредност со капацитетите и знаењето што ги има

„Алкалоид“ е водечки инвеститор во регионот на Западен Балкан, а потврда за ова доби неодамна од Western Balkans 6 Chamber Investment Forum. Во изминатите пет години компанијата инвестираше 104,1 милиони евра во земјите од регионот, интегрирајќи ги своите деловни операции.

За значењето на вложувањата и за неопходноста од регионалната соработка зборува генералниот директор и претседател на Управниот одбор, Живко Мукаетов:

„За време на веќе деветдецениското работење Алкалоид е компанија која поминува низ многу предизвици, но секогаш константа биле инвестициите. Во последните три децении посебно се посветивме на континуирано инвестирање во проширување на производните погони, во нови технологии, во истражување и развој. И секако, во добри и квалитетни кадри.

Во последните пет години посебно инвестиравме во регионот, кој ние го доживуваме како домашен пазар. Од тој аспект, со инвестиција од над 104,1 милион евра, покажуваме колку ни значи регионот. Мислам дека треба да бараме заеднички синергии за да бидеме многу поконкурентни. Заедно да инвестираме, да градиме и да направиме заедничко влијание за да ги задржиме младите луѓе да останат тука во Македонија, во регионот, со целото нивно знаење кое го имаат. За да можат нашите компании заедно со нив да одат напред.

Што повеќе отворени средби, што повеќе разговори, што повеќе вмрежување за заеднички да градиме една додадена вредност. Доколку се отвориме едни кон други, мислам дека можеме сериозно да одиме напред и да покажеме дека во овој регион има капацитет, има знаење. И дека овој регион може да создава многу, многу нова додадена вредност“.