КОЈ ВЛОЖИ 660 ИЛЈАДИ ЕВРА во акциите на Стопанска банка Битола?

За 12.277 обични акции на Стопанска банка Битола платени се повеќе од 658,7 илјади евра. Станува збор за две блок-трансакции за кои информира Македонска берза, со единечна цена за акција од 3.300 денари.

Првиот блок е вреден 36.554.100 денари или 594,37 илјади евра. Со тоа вложување познат инвеститор стекнал 11.077 акции.

Не е познато дали се работи за еден или повеќе купувачи, но вториот и воедно помал пакет содржи 1.200 обични акции издадени од битолската Стопанска банка, а неговата цена е 3.960.000 денари, односно 60,8 илјади евра.

Малата банка од Битола го предизвикува интересот на инвеститорите. Во текот на месецов берзанската статистика и претходно забележала три блок-трансакции, една на 10 и две на 15 октомври, по цени за акција од 4.050, 3.920 и 4.100 денари.

Инаку, на првиот работен ден од оваа седмица со акциите на СТББТ се тргувало и на официјалниот пазар. Истргувани се 242 акции по цена од 3.251,03 денари, а остварениот промет е во износ од 786.750 денари (12,8 илјади евра). Дневната промена кај вредноста на акцијата е 1,59 проценти.