ЕУ ќе плати повеќе од 50 милијарди евра за полнење на складиштата за гас

Европските капацитети за складирање гас се полни до 71% од нивниот капацитет, покажуваат податоците на „Gas Infrastructure Europe“. Ова е највисокото ниво во просек за последните пет години за овој период од годината. Но, висока е и цената што ја плаќаат Европејците, пишува „Reuters“.

За вбризгување на планираните количини гас за оваа година – до најмалку 80% од капацитетот на сладишата за гас, земјите од ЕУ ќе платат вкупно над 50 милијарди евра, што е 10 пати повисока од просечната цена по која се вбризгува гасот за зимата. Сепак, овие пресметки се базираат на цената на зимските залихи на самото место на пазарите во моментов.

Традиционално, потрошувачката на гас паѓа во текот на летото, а потоа се намалуваат и цените. Така, складиштата за гас имаат двојна улога, не само што ги балансираат наглите промени во потрошувачката во зима, туку и ги одржуваат цените пониски со влегување во мешавината на добавувачи.

Во 2021-ва и 2022-ра година, пак, ситуацијата е поинаква. Поради ограничените залихи и војната во Украина, пазарите се нервозни, а цените високи. Утрово (5-ти август) тргувањето на холандската берза „ТТФ“ се отвора со септемвриска цена за испорака од околу 200 евра за мегават час.

Аналитичарите се категорични дека има два фактори кои ќе играат улога оваа зима, и двата крајно непредвидливи, температурите и снабдувањето со природен гас од Русија. Оваа неизвесност и во двете ситуации ќе продолжи да тежи на пазарите во наредните месеци.

Така, и покрај високите цени, европските компании имаат мал избор освен да пумпаат гас во складишта за гас, а многу влади обезбедуваат кредитни линии и други гаранции дека капацитетите ќе бидат полни. Како мерка за обезбедување дополнителен гас за складирање, голем број европски земји се префрлија на јаглен за производство на електрична енергија поради ограниченото снабдување на „Северен тек 1“.

Според анализите на Европската комисија (ЕК), вбризгувањето на складиштата за гас до најмалку 80 отсто од нивниот капацитет до 1-ви ноември ќе создаде доволен тампон за покривање на врвната потрошувачка во зима. Според податоците на „GIE“, ЕУ е на пат да се усогласи со најновата регулатива и да ги инјектира потребните количини гас.

Според „UBS“, во моментов има 78,8 милијарди кубни метри гас во складиштата за гас низ Европа. За да можат земјите да бидат целосно независни од руските залихи, потребни се уште 25 милијарди кубни метри.

Некои членови на заедницата, исто така, поставија свои национални цели, Германија, која е најголемиот корисник на гас во Европа и најголемиот пазар на „Газпром“, планира да испумпува 95% од својот капацитет за складирање на гас. Во моментов, количината на гас во складиштата во земјата достигнува 171 терават час или нешто повеќе од 70% од нивниот капацитет. Годишната потрошувачка на гас во Германија достигнува околу 995 терават часови.

Аналитичарите коментираат дека Европа најверојатно нема да има проблем и ќе ги испумпува потребните количини гас за зимата. Главен фактор за тоа се зголемените залихи на течен гас во последните месеци. Од почетокот на 2022-ра година, земјите од заедницата купиле 21,3 милиони тони течен гас. За споредба, во истиот период минатата година ЕУ купила 8,2 милиони тони течен гас.