Аналитика
Новиот гувернер на германската централна банка Јоаким Нагел предупреди дека високата инфлација може да потрае подолго од моментално очекуваното, порачувајќи ѝ на Европската централна банка дека мора да биде подготвена да ја прилагоди монетарната политика.
Инфлацијата во еврозоната минатиот месец се зголеми на пет отсто, што е највисоко ниво откако Европската статистичка служба почна да ги следи податоците, што е повеќе од двојно повисока од целта на ЕЦБ.
Од друга страна, банкарските претставници постојано нагласуваат дека цените нема брзо да растат со текот на времето, укажувајќи на високите трошоци за енергија и нагласувајќи дека инфлацијата треба да се намали под целта од два отсто до крајот на 2022 година.
Новиот германски гувернер во инаугуративниот говор предупреди дека не треба премногу да се потпираат на таквите прогнози бидејќи цените би можеле да продолжат да растат посилно отколку што се очекува во моментов.
– Точно е дека високите стапки на инфлација можат да се припишат, меѓу другото, на еднократни фактори кои сами ќе исчезнат. Но, тие не се единствената причина, рече Нагел.
Тој забележува дека „среднорочните прогнози во моментов се многу неверодостојни и цените би можеле да се зголемат дури и пониско од проценетото“
– Сепак, ми се чини дека во моментов постои опасност стапката на инфлација да остане повисока на долг рок од моментално очекуваното, истакна новиот шеф на Бундесбанката.
Претседателката на ЕЦБ, Кристин Лагард, на церемонијата посочи дека граѓаните на еврозоната кои се загрижени за растот на цените можат да и веруваат на ЕЦБ и да бидат сигурни дека таа ќе ја стабилизира инфлацијата.
– Разбираме дека растот на цените загрижува многумина и ја сфаќаме таа загриженост многу сериозно… Луѓето можат да бидат уверени дека нашата посветеност на стабилноста на цените е непоколеблива, што е клучно за цврсто закотвување на инфлациските очекувања и за довербата во валутата, нагласи Лагард.
На последната седница минатата година, ЕЦБ објави крај на кризната програма за купување средства на крајот на март, но и паралелно зголемување на вредноста на стандардната програма за поддршка на економскиот раст и инфлацијата, која е воведоа по должничката криза.
Нагел денеска изјави дека монетарната политика можеби ќе треба да реагира доколку инфлацијата ги надмине очекувањата.
– И покрај неизвесноста, јасно е дека Управниот совет на ЕЦБ ќе мора да интервенира и да ја приспособи монетарната политика доколку тоа го бара ценовната стабилност, изјави новиот шеф на Бундесбанката.
