Аналитика
По силни кавги и во вжештена атмосфера, албанскиот парламент го одобри составот и програмата на новата влада, која по четврти пат ќе ја предводи Еди Рама. Сепак, гласањето беше обележано со контроверзии околу министерот за вештачка интелигенција – виртуелен бот по име Диела.
На напната парламентарна седница, албанскиот премиер Еди Рама ја презентираше својата програма, но тензиите се зголемија кога во салата беше емитувано видео од Диела што ја назначи за министер за вештачка интелигенција, предизвикувајќи лута реакција од пратениците на опозицијата.
„Не сум тука да ги заменам луѓето, туку да им помогнам“, рече ентитетот на вештачката интелигенција – аватар што личи на жена облечена во традиционална албанска облека – во видео кое беше прикажано пред законодавниот дом.
„Член на кабинетот“ на вештачката интелигенција е всушност дигитален асистент што ќе се користи за намалување на корупцијата, непотизмот и судирот на интереси во процесите на јавни набавки, рече Рама додека го презентираше пред пратениците.
Дигиталниот асистент веќе се користи на државниот портал за дигитални услуги e-Albania.
Опозициските партии го оспорија назначувањето како неуставно, бидејќи ботот не е човек, нема албанско државјанство и, според нив, може да ја зголеми корупцијата.
Владата има вкупно 17 министри. Социјалистичката партија се закани дека програмата нема да се дискутира, туку ќе биде предмет на директно гласање. По продолжувањето на седницата, претседателот на парламентот, Нико Пелеши, ја стави програмата на гласање, кое беше одобрено со 82 гласа.
Пратениците од опозицијата од Демократската партија реагираа бурно, фрлајќи го деловникот на парламентот и шише вода кон Рама.
Ова беше прв пат програмата да не биде презентирана и дискутирана, туку директно ставена на гласање. Седницата траеше само 25 минути, наместо очекуваните 25 часа дебата.
По седницата, Рама напиша на Фејсбук дека пратениците треба да можат слободно да дискутираат во парламентот и дека победата на социјалистите на изборите е обврска за ставање крај на насилството и навредите во салата.
Рама посочи дека неговиот четврти мандат е фокусиран на пристапувањето на Албанија во Европската Унија до 2030 година.
Албанија го отвори првото поглавје од преговорите за членство во октомври 2024 година, по долго чекање од поднесувањето на апликацијата во 2009 година и статусот на кандидат од 2014 година.
(Фото: Фејсбук профил на Еди Рама)
