Аналитика
Порталот Pari.com.mk утре ќе објави ексклузивно интервју со гувернерката на Народната банка, Анита Ангеловска-Бежоска. Еден од фокусите на интервјуто ќе бидат мерките и активностите за подигање на финансиската писменост и заштита на потрошувачите во земјава.
Кај нас, степенот на финансиска писменост е блиску до степенот во земјите од регионот, но во споредба со развиените земји има простор за подобрување. Двете мерења на финансиската писменост, иницирани од Народната банка, а спроведени во соработка со ОЕЦД, покажуваат дека нашите граѓани оствариле 56% од максималната вредност. Со цел да се подобри овој резултат, Народната банка презема бројни активности и мерки, за кои во интервју за „Пари“ зборува гувернерката на Народната банка, Анита Ангеловска-Бежоска.
Со гувернерката на Народната банка зборувавме за новата Стратегија за финансиска едукација и финансиска инклузија, која што е прва национална стратегија за оваа намена. Како што во интервјуто ни посочи гувернерката на Народната банка, Стратегијата содржи 20 групи мерки и активности ‒ 8 во делот на финансиската едукација и 12 во делот на финансиската инклузија.
Дел од тие мерки веќе започнаа да се спроведуваат од страна на Народната банка, со пропишувањето на Насоки за стандардизација и унифицираност при објавување на податоците за најрепрезентативните банкарски производи за население од страна на банките и штедилниците. Со ова, како што истакнува Ангеловска-Бежоска во интервјуто, ќе се зголеми транспарентноста и достапноста на податоци за граѓаните, а со тоа ќе се зајакне заштитата на потрошувачите на финансиски услуги.
За мерките кои што се преземаат и ќе се преземаат за подигнување на финансиската писменост, финансиската вклученост, заштитата на потрошувачите, како и развојот на финтек-секторот во земјава, читајте во утрешното интервју со гувернерката на Народната банка, Анита Ангеловска-Бежоска.
