Враќање во групата средни банки најавува Стопанска од Битола

Враќање во групата средни банки е визијата што годинава треба да ја оствари Стопанска банка а.д. Битола. Планот е тоа да се постигне со понуда на универзален асортиман услуги, со одржување силна репутација професионално поддржана од пазарно ориентиран, добро обучен менаџмент и кадар со највисок степен на стручност и интегритет.

Во проекцијата на битолската банка е зацртано подобрување на сите параметри. На пример, во рамки на пазарното учество, активата од ланските 1,71, годинава треба да достигне 2,04 проценти. Притоа, депозитите на нефинансиски субјекти се планира од 1,55 да се зголемат на 1,75, проценгти, а кредитите – од 1,74 на два проценти.

Што се однесува до квалитетот на активата, целта е високо позиционирана, односно нефункционалните кредити од 4,28, се предвидува да се сведат на 1,67 проценти.

Секако, нагорни поместувања се планирани и кај профитабилноста. Стапката на поврат на капиталот (ROЕ) по оданочување лани била 1,63, а годинава е позиционирана на 3,54 проценти. А, пак, стапката за поврат на средствата (ROА) по оданочување била 0,26, и во оваа 2023 треба речиси да се удвои, односно да дојде до 0,49 проценти.

Надминување се предвидува во сите сегменти од работењето. Каматите треба да донесат нето-приходи повисоки од ланските за 8,14 насто, или од 5,4 да пораснат на 5,8 милиони евра. Провизијата и надоместоците се смета да обезбедат прилив поголем за 4,83 насто (од 2,3 да достигнат 2,4 милиони евра). Оттаму, кај бруто-добивката во план е натфрлување од 120,56 проценти. Во конкретни бројки тоа значи од минатогодишните 531,7 илјади да се дојде до 1,1 милион евра. Односно, нето-добивката да се зголеми за 117,25 насто и од ланските 485,8 илјади, годинава на Банката да и останат чисти 1,05 милиони евра.

Амбиционзните стремежи предвидуваат максимизирање на вредност на Банката преку супериорно финансиско работење. Тоа опфаќа: понуда на висококвалитетни производи и услуги за клиентите, кои во целост ќе одговараат на нивните потреби;. генерирање позитивни финансиски резултати и повисoк коефицент на принос на капиталот при прифатливо ниво на ризик; сигурност на работните места за вработените и инвестиции во заедницата.

Оттука и стратегиската определба – обезбедување долгорочна финансиска стабилност. Со што ќе се штитат интересите на клиентите, акционерите, деловните партнери и вработените.

Банката ќе ги зголемува сопствените средства со распоредување на проектираниот позитивен финансиски резултат во задржана добивка, а  и ефикасно ќе управува со трошоците за работењето. Исто така, годинава ќе се работи и на дигитализација на продуктите и сервисите, преку развој на дигитални платформи за привлекување клиенти и за комуникација со нив.

Преземањето на авторски содржини (текстови и фотографии) од оваа страница е дозволено само делумно и важат условите опишани на следниот линк.