Аналитика
По неколку месеци исчекување, градоначалничката на Париз, Ана Идалго, денес конечно се искапе во матните води на реката Сена, девет дена пред церемонијата на отворање на Олимписките игри во 2024 година, за да докаже дека речните води се добри за капење.
Облечена во модерен костим кој го покрива целото тело, Идалго скокна во реката во близина на градското собрание со импресивен изглед, нејзината канцеларија и катедралата Нотр Дам. На париската градоначалничка ѝ се придружи шефот на Париз 2024 година, Тони Естанге.
Тие тргнаа по стапките на француската министерка за спорт Амели Удеа-Кастера, која во саботата пливаше во Сена облечена во одело за целото тело.
Тоа е дел од пошироките напори за прикажување на подобрената чистота на реката пред летните олимписки игри, кои ќе започнат на 26 јули и ќе бидат домаќини на натпревари во пливање на отворено. Главниот воден пат на француската престолнина ќе биде во центарот на церемонијата на отворањето на игрите во 2024 година, а властите работеа напорно за да го исчистат од загадувањето.
Загриженоста за протокот на реката Сена и нивоата на загаденост опстојуваа како што се приближуваат Олимписките игри, што предизвика секојдневни тестови за квалитетот на водата од страна на мониторинг групата Eau de Paris. Дневните тестови за квалитетот на водата на почетокот на јуни покажаа небезбедни нивоа на бактеријата E. coli, но оттогаш се забележани подобрувања.
Летните игри ќе започнат на 26 јули со раскошна церемонија на отворено, која вклучува спортска парада на реката. Сена ќе биде домаќин на неколку пливачки настани на отворени води за време на игрите, вклучувајќи маратонско пливање и пливачки сегменти на олимписките и параолимписките триатлони.
Пливањето во Сена е забрането повеќе од еден век и покрај повеќегодишните ветувања за чистење на реката. Жак Ширак, поранешниот француски претседател, даде слично ветување во 1988 година кога беше градоначалник на Париз, но тоа никогаш не беше реализирано.
Од 2015 година, организаторите инвестираа околу 1,38 милијарди евра за да ја подготват Сена за Олимпијадата и да обезбедат парижаните да имаат почиста река во годините по игрите. Планот вклучуваше изградба на огромен подземен базен за складирање на вода во центарот на Париз, реновирање на канализационата инфраструктура и надградба на пречистителни станици.
Првично планирано за јуни, пливањето на Идалго беше одложено поради предвремените парламентарни избори во Франција. На оригиналниот датум, хаштагот „jechiedanslaSeine“ („Јас какам во Сена“) беше во тренд на социјалните мрежи бидејќи некои се заканија дека ќе протестираат против Олимпијадата со вршење нужда низводно.
