ВЛАСТ И ОДГОВОРНОСТ Е ИСТО КАКО „ауди А6“ и „ситроен ксара“

„Премногу сериозна и катастрофална е состојбата со корупцијата во земјата, за излезот да се гледа во закон за потекло на имотот, што го предлагаше Љупчо Николовски и сега Антикорупциска или во ветингот што и за себе го бара Али Амети“ – ова е ФБ статус на поранешниот министер за финансии Џевдет Хајредини, објавен по веста за опожареното возило во скопски Чаир, кое (не) се поврзува со првиот владин вицепремиер Артан Груби.

Едноставно, палењето на возилото во случајот не е само деликвентски чин, затоа што произлезе дека и без тој пиромански акт има индиции за криминал и изигрување на законите. На што упатуваат реакциите на осуда, односно употребата на присвојните заменски придавки во контекст на – не е „мое“ и „неговото“ (возило). Оттаму сама се наметнува и споредбата – власт и одговорност е исто како „ауди А6“ и „ситроен ксара“.

Од гледна точка на даноците, донекаде е сеедно чие е скапото „ауди“ А6, секако, доколку за него се плаќаат даночните обврски. Но, ако не…

Како што објасни во својот ФБ статус и даночниот експерт Павле Гацов – „користењето туѓо возило е форма на закуп“. Закупот, пак, е „оданочив доход за сопственикот на возилото“, па оттаму и логката дека „сопственикот  наплатува закупнина“.

И да не е закупот во прашање, бидејќи возилото е на соседот, тогаш се смета дека се работи за подарок, и како што наведува Гацов, тоа е „исто така доход кој се оданочува со данок на доход“, според основицата – „пазарната вредност на закупнината што би се остварила“.

Според него, „во овој случај данок плаќа корисникот ‘за без пари’ на возилото“.

И покрај тоа, се чини тешко е да се дојде до разврска.

Од Основното јавно обвинителство соопштија дека го испитуваат случајот. Меѓу другото, од ЈО е „дадена наредба да се обезбеди документација за начинот и времето на прием, сопственост и користње на возилото. Државната комисија за спречување корупција е надлежен орган за евидентирање и следење на богатството на избраните и именуваните лица, како и за проверка на податоците во изјавите за имот. Доколку од контролите се покажат елементи на кривично дело кое се гони по службена должност, Обвинителството ќе постапи согласно законските овластувања“.

Од друга страна, од ДКСК посочуваат дека добиваат дојави за функционери кои не пријавуваат имот, но тоа не можат да го докажат.

„И порано имавме дојави за функционери дека имаат и друг имот, но не можеме да докажеме, бидејќи е регистриран на друго име. Затоа, со години го зборуваме истото, дека е потребен закон за потекло на имот. Секој граѓанин да каже од каде му е стекнатиот имот. По донесување на законот нека има една година за изјаснување секој да каже од каде му е досега стекнатиот имот, а за новостекнатиот да каже од каде му се средствата. Потоа тоа може да се следи од Управата за финансова полиција“, изјави Билјана Ивановска од ДКСК.

Кривичниот законик го предвидува прикривањето имот. Впрочем, деновиве ќесто се цитира членот 359-а:

„Службено лице и одговорно лице во јавно претпријатие или јавна установа кое спротивно на законската должност за пријавување на имотната состојба дава лажни податоци за своите приходи, или кога ќе се утврди дека неговиот имот значително ги надминува неговите легални и пријавени за оданочување приходи ги прикрива неговите вистински извори, ќе се казни со затвор од шест месеци до пет години и со парична казна.

Имотот кој значително ги надминува приходите што ги остварува и пријавените за оданочување приходи за кои сторителот ги прикрива вистинските извори се одзема, а ако неговото одземање не е можно од сторителот се одзема друг имот што одговара на неговата вредност. Имотот се одзема и од трети лица на кои е пренесен без соодветен надоместок“.

Од Владата го осудија чинот на палење на возилото што го користи Груби и упатија на тоа дека надлежните веќе постапуваат за случајот.

„Сите надлежни институции, истражните и судските органи, во рамките на своите надлежности постапуваат без одлагање, одлучно и професионално со цел целосно разрешување и расчистување на овој случај во најбрз можен рок“, пишува во владиното соопштение.

Од опозицијата побараа ЈО да отвори постапка.

„Бараме ЈО да отвори постапка за прикривање на имот, потенцијално даночно затајување и злоупотреба на службена положба и овластување против Груби, кој автомобилот, за кој цела Влада потврди дека е негов, не го пријавил во својот анкетен лист и не го запишал на свое име“, нагласуваат од ВМРО-ДПМНЕ. Исто така, и прашуваат – „ако запаленото возило на Артан Груби не било во негова сопственост, тогаш кој дозволил на возило кое не е во сопственост на МВР или на друг државен орган, да се стават флешери и звучна сигнализација?“.

Во анкетниот лист Груби навел дека има „ситроен ксара“ вреден илјада евра, но воопшто не демантираше дека го користел опожареното „ауди“. Освен тоа, се пласираат информации дека тој автомобил не е на соседот Б.Л. како што наведоа од МВР, туку е сопственост на компанијата „Еуро Ком Лајтинг“ со еден единствен вработен, која се јавува како купувач на хотелот на „Гранит“ лоциран на Попова Шапка.

Засега толку – запалено е скапо возило „ауди“ А6, првиот вицепремиер им се извини на комшиите затоа што имаат сосед политичар, Владата и министрите се јавија со осуда, Јавното обвинителство го повика ДКСК, антикорупционерите велат нема закон, стручњаците вперуваат прст кон (не)плаќањето даноци и прикривањето имот… А, корисниците на социјалните мрежи уште еднаш потврдија дека инвентивност и инспирација не недостасуваат кога се има добар „шлагворт“:

Како тоа Артан Груби се извинува за неговата професија во случајот со опожареното возило кога нели возилото не е негово?

Груби покриј го аудито!

Такви другари ви требаат, ко на Груби што ти дава да користиш најново ауди кога цитроен ксара ти е на сервис.

Артан Груби имал и негова кола?!?!

Само Груби не знае дека имал Ауди А6!