Аналитика
Технологијата и вештачката интелигенција се повеќе ќе навлегуваат во бизнисот и ќе станат негова неизоставна алатка, но во делот на продажбата се уште мислам дека човечката релација е основна, вели Васко Карангелески, искусен менаџмент консултант со над 20 години искуство во стратешки менаџмент, извоз и проширување на бизниси и извршен директор и основач на консултантската компанија BRULZ во новата епизода на бизнис разговори на поткастот на Наташа Велковска, New Biz Podcast.
Според Карангелески, она што може да ја потпомогне продажбата и што не е неопходно да го прави човек како автоматизација, вештачка интелигенција и разни алатки, на тоа не треба да губи човекот време. „За убрзување на sales velocity, за она што може да ја потпомогне продажбата и што не е неопходно да го прави човек како автоматизација, вештачка интелигенција и разни алатки, на тоа не треба да губи човекот време“. Но,според него, човечката релација со клиентот останува.
„Останува неопходен човечкиот елемент, но не толку колку што се форсира во Македонија, дека со човек мора да седнеме, да се видиме и запознаеме. Нормално ако некој ти носи милион евра промет, ќе одиш еднаш двапати годишно да се видиш со него и на ручек, но не и шеспати седнување за дил од 100 евра“, вели Карангелески.
„Многу работи се веќе автоматизирани и дури и автоматизациите глумат човек. Еден пример: тестирав на Линкд Ин 200 луѓе со една автоматизација, меѓутоа во едната направив намерна грешка што ЧетЏипити не би ја направил. 35% ми одговорија таму, наспроти 15% онаму каде што немаше грешка. Тука се истанува потребата од човек – во заклучување на договорот, во преговорите се бара човек“.
Експлозијата на вештачката интелигенција и бумот на технолошкиот прогрес кој се случува последниве две години може да биде вистинска можност која ѝ е потребна на Македонија. „Мислам дека сега е најдобриот момент за мали земји и мали бизниси. Генијално е тоа што се случува. Да потсетам дека во раните 2000ти да купиш софтвер беше многу скапо, а и да го купиш требаше да одиш на обука за да го примениш. Сега ни се пружа генијална можност затоа што алатките се достапни. Сега за проект менаџмент софтер имате во моментов 14.100 софтвери само за маркетинг и продажба“, вели Карангелески на прашањето дали домашниот бизнис е подготвен за имплементација на новите технологии.
Вториот важен аспект, според него е што бизнисот веќе не е локален, смета Карангелески. „Пред 15 години зборевме бизнисот е локален и пазарот е тука. Сега пазарот е огромен. Да, имате производи кои имаат радиус на испорака, не можеш свежи патлиџани да носиш во Австралија, но можеш да носиш ајвар. Пазарот е достапен, но конкуренцијата е зголемена и јас би рекол затоа треба да убрзаме малку затоа што не сме само ние во игра туку цел свет“.
За Карангелески новите генерации поради можностите кои им се при рака имаат и ум поотворен за нови работи. Тој наведува пример на македонска новооснована компанија која за 21 месец направи 4 милиони годишен приход од претплата. Двата основача денес имаат 25 години. „Од една страна имаме такви примери во Македонија, од друга страна имаме моја и постара генерација менаџери кои велат тоа не е за нас“, вели тој. Сепак, додава, големите фирми кои работат глобално, се прилагодуваат и си ги купуваат тие системи“.
Како пример дека новите технологии овозможуваат за многу малку пари да се сменат на подобро нештата во еден бизнис, Карангелески го наведува примерот на една компанија со која соработувал. „Тие се проектанти во машинството, имаа голем број на мали проекти кои требаше за 4 дена да се воведат, и со еден софтвер кој ги чини еднаипол плата на човек, годишно, они успејаа да го намалат бројот на денови за воведување на проектот од седум на два дена, и сега, колку е тоа заштеда на компанијата. Неодамна ми рекоа дека успеале да воведат и шест нови земји благодарение на тој нов систем бидејќи им овозможи контрола и на вработените и на менаџментот, да имаме поголем преглед на теренските проекти. Таков софтвер пред 15 години би чинел стотици илјади евра, а сега чини 1000 долари годишно, целиот софтвер за проектен менаџмент кој го користат за повеќе намени“.
Што се однесува до употребата на технологијата, овој проблем има неколку димензии, вели Карангелески. „Првата е дали само користиме само технологија или и човек, тоа е едниот аспект и тука не зборуваме само алатка да се воведе, а второ се чекорите. Искуствено, прво треба да го воспоставиме системот, процесот, да знаеме што мериме, кои се чекорите, што е прифатливо за нашиот тим, што има логика, потоа го стандардизираме, па го оптимизираме. Автоматизацијата би дошла во делот на стандардизација, не би дошла во делот на воспоставување. Автоматизација – да, за оние работи кои нема поента да се прават рачно кога можат да се автоматизирани преку некаква алатка или процес““, вели Карангелески.
Тој наведува и обратен пример. „Во една фирма имаше процес кој ги не ги задоволуваше потребите, од осум чекори, јас работев со нив и случајно го согледав, имаа проектанти во различни сектори коишто по 20тина минути дневно трошат за да внесат податоци од текот на денот. Имаше и одложување, требаше после дсето тоа да се одобри па да почне да се работи. И тој процес од 8 чекори што го направиле за да бидат безбедни вработените и податоците, јас всушност, пресметав дека на 86 луѓе, кога ќе им се симнат 20 минути дневно, со намалување на чекорите на 4 се заштедија 486 работни дена без технологија, значи само процесот требало да се оптимизира. Но, тоа ни го покажа една алатка инаку немаше да го согледаме“, додадава тој.
Вештачката интелигенција за година дена мислам ќе биде на ниво на она што беше претходно она: не си на интернет, не постоиш. Сега ќе биде: не користиш вештачка интелигенција -значи, не постоиш, заклучува Карангелески.
Целата епизода и слични на оваа се достапни на New Biz Podcast
