Аналитика
Сопственикот на Твитер и на Тесла, Илон Маск за време на својата изненадувачка дипломатска посета на Кина, вчера разговараше со кинескиот министер за надворешни работи, Чин Ганг, во обид да влијае на смирување на исклучително тензичните односи меѓу САД и Кина. Ова беше првата посета на милијардерот од Тесла на Кина по повеќе од три години.
Некои кинески медиуми со симпатија ја коментираат посетата на Маск на Кина, нарекувајќи го „Братот Ма“. 51-годишниот Маск последен пат ја посети Кина во јануари 2020 година, веднаш откако фабриката на Тесла во Шангај почна да произведува автомобили. Фабриката произведе над 700.000 возила Model Y и Model 3 минатата година, повеќе од половина од глобалното производство на компанијата.
Кинескиот министер, кој до неодамна бил амбасадор на Кина во САД, му рекол на Маск дека двете земји мораат да „избегнуваат опасно возење“ и „да го држат воланот во вистинската насока на меѓусебно почитување, мирен соживот и соработка меѓу двете страни“.
Посетата на Маск беше обид тој да се вклучи во напорите да се смири влошувањето на дипломатските односи меѓу САД и Кина, како многу опасен геополитички момент. Маск се сретна и со кинескиот министер за трговија, а побарал средба и со премиерот Кси Џипинг. Во соопштението на кинеската влада се тврди дека Маск се противи на „раздвојување“ на односите меѓу двете земји.
Твитер е забранет во Кина и г-дин Маск не твитна откако слета во Пекинг во вторникот наутро со својот приватен авион за неговата прва посета по пандемијата.
Се очекува милијардерот да ја посети гигафабриката во Шангај за време на неговото патување во Кина, бидејќи компанијата планира да го зголеми производството во земјата. Тесла ги претстави плановите за проширување на капацитетот во гигафабриката во Шангај и поставување нова локација за производство на мегапакети, системи за складирање на енергетската мрежа на компанијата.
Паралелно со засилените политички тензии, меѓу двете држави беснее вистинска трговска војна, чијашто битка за чипови напред-назад меѓу САД и Кина наскоро би можела да излезе од контрола.
Пред 2019 година, имаше неколку големи пречки за кинеска компанија која работеше во САД од Кина. Но, среде ескалацијата на американско-кинеските трговски тензии, особено откако Вашингтон воведе санкции за телекомуникацискиот гигант Huawei (HWT.UL), некои кинески фирми почнаа да поставуваат седишта во странство – потези кои би можеле да им помогнат да привлечат помалку внимание на американската влада.
Главните точки на удар вклучуваат ограничувања на извозот на чипови во САД и загриженост за безбедноста на податоците поради кои е забрането TikTok во сопственост на ByteDance на уредите на американската влада и целосно од државата Монтана. Од своја страна, Кина неодамна ги блокираше клучните индустрии да ги користат производите на Micron Technology (MU.O) и се обиде да ги заузда странските консултантски компании и фирмите за должна анализа.
Иако на Самитот на Г-7 во Јапонија неодамна претседателот Бајден предвиде дека односот меѓу двете светски економски суперсили „ќе се одмрзне многу брзо“, Кина не го дели истиот оптимизам. Истиот ден, Управата за кибернетски простор на Кина (CAC) објави забрана за производите од американскиот производител на мемориски чипови Micron Technology по двомесечна истрага, тврдејќи дека потенцијални безбедносни проблеми на мрежата би можеле да ја загрозат националната безбедност на Кина. Агенцијата му кажа на Micron дека ги известила операторите на критична информациска инфраструктура во Кина да престанат да ги користат производите на компанијата.
Овој потег претставува прва значајна одмазда на Кина на низата американски потези минатата година, вклучително и блокирање на способноста на Кина да увезува најнапредни чипови за вештачка интелигенција од САД, заедно со најсовремена опрема за производство на чипови. Забраната ќе му наштети на бизнисот на аметиканскиот гигант за полупроводници Микрон.
Американските званичници оценија дека најновиот волеј на Кина во битката со чипови е многу повеќе од пропорционален одговор и најавија дека САД ќе се свртат кон „своите сојузници“ за помош, по кинескиот потег. Наведениот сојузник најверојатно е Јужна Кореја. Според TrendForce, два производители со седиште во Кореја, SK Hynix и Samsung, сочинуваат речиси три четвртини од глобалниот пазар на меморија, наспроти Micron со 23%.
Ако САД возвратат, Кина може целосно да ја прошири економската битка на други пазари. Како што напишав во април, на Кина ќе и биде тешко да ги запре големите американски производители на чипови кои ги прават поважните логички чипови потребни за управување со нивните компании. Кина нема многу алтернативи за снабдување на производите од Intel (INTC), Advanced Micro Devices (AMD) или Nvidia (NVDA).
Но, Кина би можела да одлучи да ги притисне американските корпорации со големи деловни операции во нејзините граници, вклучувајќи ги Тесла, Епл, Старбакс и Најк. Тоа најверојатно ќе предизвика уште една рунда одмазда без јасен крај.
