Аналитика
Toyota ја искористи најголемата сцена за иднината на автомобилите Japan Mobility Show 2025 во Токио за да покаже како ќе изгледа следното поглавје на глобалниот бестселер. Новата Corolla Concept не е само уште еден редизајн, туку целосно нова филозофија: флексибилна архитектура што поддржува електричен, хибриден и класичен бензински погон, со можност и за алтернативни, јаглеродно неутрални горива. Извршниот директор Коџи Сато појасни дека целта е јасна – да се понуди избор без компромиси, а Corolla да остане автомобил кој се прилагодува на секој пазар и на секој возач.
На изглед, ова е Corolla каква што не сме виделе. Дизајнот, развиен во европскиот студио ED² во Ница, го напушта познатото и се претвора во динамична, ниска и издолжена силуета што граничи меѓу седан и фастбек. Предниот дел носи префинет „hammerhead“ потпис со тенки LED светлосни линии, додека задниот дел е заокружен со интегриран „ducktail“ спојлер и широка хоризонтална светлосна лента со натпис „Corolla“. Пропорциите се решително модерни: 21-инчни Y-крак тркала, чисти површини и остри рабови, детали кои му даваат премиум став и аеродинамична дисциплина. Еден од любопитните елементи што го привлече вниманието на посетителите е повеќекратниот распоред за полнење/гориво, сигнал дека концептот е замислен за повеќе погонски сценарија, од plug-in хибрид до целосно електричен модел.
И внатрешноста ја следи истата идеја за напредна едноставност. Кабината е минималистичка и технолошки чиста: хоризонтална табла, дигитален инструмент панел, посебен екран за совозачот и „лебдечка“ централна конзола со компактна селектор-рачка, чија форма го рефлектира екстериерниот јазик. Контролите се групирани околу воланот за интуитивен досег во движење, а редуцираните физички копчиња создаваат чувство на современа, функционална тишина.
Toyota засега ги чува бројките, но насоката е јасна: новата платформа ќе ја поддржи стратегијата „multi-pathway“ со целосно електрични, хибридни и plug-in хибридни решенија, како и нова генерација мотори од 1.5 и 2.0 литри – полесни, помали и поефикасни. Производната верзија се очекува во 2026 година, со глобална офанзива што може да се протегне и во 2027 година, зависно од пазарите и хомологациските рокови.
Тешко е да се преувеличи значењето на името Corolla. Од 1966 година, овој модел се појави во низа облици – седан, хечбек, караван, купе, па дури и миниван – и со повеќе од 55 милиони испорачани примероци остана најпродаваниот автомобил во историјата. Со новиот концепт, Toyota сигнализира дека легендата не мирува: дизајнот станува посмел, технологијата поинтегрирана, а понудата на погони – поширока од кога било.
На штандот во Токио, Corolla не беше самa. Компанијата прикажа и цела палета футуристички решенија за мобилност – од Kids Mobi, мали возила со едукативна димензија за најмладите, преку Boost Me, агилна платформа наменета за лица со посебни потреби, до автономни „пајак“-возила за логистика и лично движење. Пораката е кристална: иднината не е само електрична, туку флексибилна, човечка и практична.
Ако серискиот модел ја задржи оваа комбинација од авангарден изглед, рационална практичност и широка палета на погони, Corolla повторно може да ја зацврсти доминацијата на глобалниот пазар само овојпат, со дизајн од иднината и погон што го избирате според сопствени правила.
