Аналитика
На први октомври ќе протече природен гас низ терминалот во Александрoпули со што и официјално ќе се потврди дека е воспоставен нов енергетски пазар за прием на природен гас, во кој Македонија има свој удел станувајќи дистрибутивна точка во регионот.
Учеството на државата е десетпроцентно во терминалот, а во гасната централа со капацитет од 800 мегавати има 25 проценти. Во овој проект влезе пред повеќе од три години, а изградбата беше започната во 2022. Со тоа ја обезбеди независноста од рускиот гас, како и другите земји од источниот дел на Европа. Во системот се опфатени Грција, Бугарија, Романија, Македонија, Србија, Молдавија, Украина, Унгарија и Словачка.
Како што се предвидува, наскоро индустријата и домаќинствата во земјава ќе имаат пониски трошоци во снабдувањето со природен гас. А, работите ќе се одвиваат преку ЕСМ и Национални енергетски ресурси.
Во гасниот систем Александрoпули ЕУ инвестира 202 милиони евра. Одлуката донесена пред неколку дена од страна на ЕК само го потврдува значењето на целиот проект. Во тој контекст е и соопштението од СДСМ, бидејќи активностите за приклучување кон овој голем проект се случија во нивниот мандат.
„Со овој проект, државата ќе обезбедува 500 милиони кубни метри гас годишно, што ја надминува годишната потрошувачка од 400 милиони кубни метри. Македонија ќе обезбедува повеќе од доволно за да ги задоволи домашните потреби и ќе може да се пласира гас и во соседните земји, како Србија и Косово. Овој проект ќе ѝ обезбеди можност на државата за дополнителни приходи преку извоз на гас во регионот.
Покрај ова, оваа енергетска инфраструктура ја зајакнува енергетска независност и придонесува за зголемена енергетска сигурност на нашите граѓани и економија.
Покрај обезбедувањето на неруски гас, проектот вклучува и изградба на енергетска централа со капацитет од 800 мегавати, која ќе биде завршена во 2024 година“, велат од СДСМ.
